Multikultural gülüş - WUF13-dən yeni FOTOLAR

Bakı şəhəri altı gün qlobal şəhərsalma və dayanıqlı inkişaf müzakirələrinin mərkəzinə çevrildi. Həmin müddətdə dünyanın ən müxtəlif nöqtələrindən Azərbaycan paytaxtına təşrif gətirən hökumətlərin və beynəlxalq təşkilatların nümayəndələri, tikinti və şəhərsalma sahəsində çalışan mütəxəssislər, memarlar və digər sahələrin təmsilçiləri urbanizasiya və şəhər inkişafının gələcək istiqamətlərinə ən müasir yanaşmaları müzakirə etdilər. Tədbir iştirakçıları həm də Azərbaycan paytaxtında xeyli təcrübə əldə etdilər, mənzil böhranının həlli sahəsində müasir yanaşmalara, urbanizasiya diplomatiyasının Azərbaycan modelinə yiyələndilər, "ağıllı şəhər” və "ağıllı kənd” konsepsiyası sahəsində ölkəmizdə tətbiq olunan son təcrübələri öyrəndilər. Ən başlıcası, burada həmkarlar arşında fikir mübadiləsi apardılar, şəhərsalma standartlarının yeni trendlərindən xəbər tutdular, özlərinə çoxlu tərəfdaş və dost qazandılar. Yüksək səviyyədə keçən forumda onların üzündəki təbəssüm, çöhrələrindəki xoş hisslər də yəqin ki, bununla əlaqədardır.

Qayanrinfo-nun AZƏRTAC-a istinadən WUF13-lə bağlı təqdim etdiyi növbəti fotoreportajda müxtəlif dillərdə danışan, ayrı-ayrı millətlərin nümayəndələrinin Bakının qonaqpərvər mühitində birləşən xarici qonaqların, tədbirin yerli iştirakçılarının üzlərindəki səmimi təbəssümlər əks olunub. Fərqli mədəniyyətlərin Bakıda bir araya gələrək yaratdığı bu unikal və rəngarəng harmoniya tədbirin rəsmi nəticələri qədər bəşəriyyət üçün böyük dəyər kəsb edir.