Qulamhüseyn Əlibəyli: "Azərbaycanın bundan sonra rus silahlarına ehtiyacı yoxdur"

Bunu Qaynarinfo-ya açıqlamasında siyasi şərhçi Qulamhüseyn Əlibəyli Vladimir Putinin Rusiya silahları almaqla bağlı KTMT ölkələrinə ünvanladığı təklifi şərh edərkən deyib. 

Ekspert qeyd edib ki, bu yolla Kreml bir tərəfdən köhnə silahların satılmasına nail olmaq istəyir: 

"Digər tərəfdən isə həmin silahlara nəzarət mexanizmi yenə də Rusiyanın əlində qalır. Həmin silahlarda müxtəlif proqramlar yerləşdirilə və kənardan da idarə oluna bilər. Görünür, Kreml bununla istəyir ki, postsovet ölkələrinin hərbi strukturları onun öz nəzarəti altında olsun və istənilən zaman həmin silahlarla manipulyasiya etmək imkanı qalsın".

Həmsöhbətimizin fikrincə, Putinin təklifi həm də hədə-qorxu xarakteri daşıyan bir təklifdir:

"Bu da Moskvanın siyasətindən irəli gələn məsələdir. Amma həmin hədə qorxunun MDB, hətta KTMT ölkələrinə ciddi təsir göstərəcəyini də düşünmürəm. Çünki keçmiş postsovet ölkələrinin mütləq əksəriyyəti artıq Rusiyanın təsir dairəsindən çıxmağa hazırlaşır".

 

Qulamhüseyn Əlibəyli bildirir ki, Azərbaycanın bundan sonra rus silahlarına ehtiyacı yoxdur:

"Azərbaycan başqa ölkələrdən, İsraildən, Türkiyədən kifayət qədər silah alır. Ermənistana gəldikdə, onlar hələ də Rusiyadan asılıdır, amma bununla belə, İrəvanın rus silahlarını almağa meyilli olması bir qədər çətin məsələdir. Hazırda Ermənistan Rusiyanın təsir dairəsindən çıxmağa çalışır. Bu fonda rus silahlarını almağa başlaması yenidən Ermənistanın Moskvanın təsiri altına qayıtması anlamına gələcək. Mərkəzi Asiya ölkələri də bu məsələdə fərqli mövqe tutmalıdır. Bu ölkələr hazırda daha çox Çin və Hindistanla əlaqədədir. Yəni onların da Rusiya silahlarına indi elə də ehtiyacları yoxdur".

Qeyd edək ki, Rusiya prezidenti Vladimir Putin KTMT-nin Bişkek iclasında qurum üzvü olan ölkələrə silahlı qüvvələrinin Rusiya silahları ilə silahlandırılmasını təklif edib: "Kollektiv qüvvələrin hərbi əməliyyatlarda effektivliyini sübut edən müasir Rusiya silahları və texnikası ilə təchiz etmək üçün genişmiqyaslı proqrama başlamağı təklif edirik".

Onun sözlərinə görə, Rusiya KTMT-nin hərbi potensialının gücləndirilməsi ilə bağlı bütün məsələlərdə müttəfiqləri ilə əməkdaşlığı davam etdirməyi planlaşdırır.