Birləşmiş Ştatların sabiq prezidenti Co Baydenin fiziki və zehni durumu barədə illərdir səsləndirilən narahatlıqlar artıq yalnız şəxsi zəiflik deyil, həm də Demokratlar Partiyasının və liberal medianın genişmiqyaslı problemlərinin əlaməti kimi qiymətləndirilir.

Qaynarinfo xəbər verir ki, "The Economist" dərgisində dərc olunan təhlildə Baydenin prezidentliyi dövründə və sonrakı seçim qərarlarında ortaya çıxan ciddi çatışmazlıqlar diqqətə çatdırılıb.

Jurnal qeyd edir ki, əgər bir anlıq Baydenin "yaxşı zehni formadadır" iddiasını qəbul etsək, bu zaman ortaya çıxan suallar daha da vacib görünür: Niyə o, ikinci müddətə namizədliyini müzakirə etmək üçün heç bir rəsmi görüş keçirməyib? Niyə öz reytinqi barədə şəxsi sosioloqlardan birbaşa məlumat almayıb? Və nə üçün 2024-cü ilə qədər bir çox nazirlik rəhbərləri ilə demək olar ki, əlaqə saxlamayıb?

Əlavə olaraq, jurnal Baydenin Vaşinqtonda olarkən tez - saat 16:30-da şam edib və 17:15-də şəxsi otağına çəkildiyini, xarici səfərlər zamanı isə səhər bülletenlərini buraxaraq, vizajistlə görüşə üstünlük verdiyini vurğulayır.

Baydenin ətrafındakı komanda onun fiziki zəifliklərini ört-basdır etmək üçün ciddi səylər göstərib: vertolyota gedərkən onunla birgə yürüyüb yıxılmasının qarşısını almaq, çıxışlarda montaj vasitəsilə söz ardıcıllığını düzəltmək, hətta tədbirlərə gedərkən səhnəyə doğru hərəkətini asanlaşdırmaq üçün yerə parlaq lentlər yapışdırmaq kimi tədbirlər görülüb.

NBC və "The Hill" jurnalistlərinin "Fight" adlı kitabında qeyd olunur ki, bu cür açıq müdaxilələr Baydenin zəifləməsinin əlaməti olub və bu vəziyyət donorlar, bəzi demokrat siyasətçilər və ən əsası, sadə amerikalılar üçün 2024-cü ilin iyunundakı Trampla debatdakı məğlubiyyətindən çox əvvəl də bəlli idi.

Təhlil vurğulayır ki, Baydenin səhhətinə bu gün diqqət yetirilməsi onun fərdi zəifliyini deyil, eyni zamanda Demokratlar Partiyasının və media qurumlarının institusional zəifliyini göstərmək üçündür. Partiya o qədər zəifləyib ki, istənilən namizəd onlara tam nəzarət edə bilir. Baydenin və onun yaxın ətrafının eqosu ikinci müddətə namizədlik qərarında sağlam düşüncəni üstələyib.

Eyni zamanda, uzun müddət Baydenin zəifliyi barədə susan demokratlar və liberal media nümayəndələri ancaq partiyanın içində dəyişiklik başlayandan sonra bu barədə açıq danışmağa başlayıblar.

"Respublikaçı Donald Trampa qarşı duruş gətirə bilməməsindən narazı olan demokratlar indi öz zəifliklərini və susqunluqlarını dəyərləndirməlidirlər" deyilən təhlildə vurğulanır ki, Demokratlar Partiyası yaxın zamanda yaşlı namizəd göstərməyə bilər. Lakin sadəcə gənc namizəd seçmək partiyanın əsas problemlərini həll etməyəcək. Demokratlar Baydenin mübarizə apardığı daha dərin və sistemli problemlərlə necə davranacaqlarını düşünməlidirlər.

Aydın