Maqnezium əzələlərin rahatlamasına kömək edir, sinir sistemini dəstəkləyir, ürək ritmini sabit saxlayır, həmçinin yuxu və əhval-ruhiyyəyə təsir göstərir. ABŞ Milli Səhiyyə İnstitutunun Qida Əlavələri İdarəsinin məlumatına görə, maqnezium orqanizmdə 300-dən çox ferment reaksiyasında iştirak edir.

Mütəxəssislər bildirirlər ki, bu mineralın çatışmazlığı yorğunluq, əzələ spazmları və yuxu problemlərinə səbəb ola bilər.

Nəşr maqnezium baxımından ən zəngin 6 meyvəni təqdim edib.

1. Qurudulmuş əncir

Qurudulmuş əncir maqneziumla ən zəngin meyvələrdən biri hesab olunur. Bir stəkan məhsulda təxminən 101 mq maqnezium var.

Mütəxəssislər qeyd edirlər ki, əncir tərkibində lif, kalium və kalsium da saxlayır. Bu isə həzmi yaxşılaşdırmağa və əzələ-sinir funksiyalarını dəstəkləməyə kömək edir.

Lakin yüksək təbii şəkər tərkibinə görə xüsusilə qan şəkərini nəzarətdə saxlayan şəxslərə ölçülü istifadə tövsiyə olunur.

2. Avokado

Avokado əsasən faydalı yağlarla tanınsa da, bir stəkan doğranmış avokadoda təxminən 43,5 mq maqnezium mövcuddur.

Meyvə uzun müddət toxluq hissi yaradır və buna görə dietoloqlar tərəfindən səhər və nahar yeməklərində tez-tez tövsiyə olunur.

3. Banan

Bir orta ölçülü bananda təxminən 32 mq maqnezium var.

Maqnezium və kalium birlikdə əzələ fəaliyyəti və orqanizmin su balansında mühüm rol oynayır. Bu səbəbdən banan idmançılar arasında populyar məhsul hesab edilir.

4. Böyürtkən

Bir stəkan böyürtkən təxminən 29 mq maqnezium ehtiva edir.

Bundan əlavə, böyürtkən lif və antioksidantlarla zəngindir. Tünd rəngi antioksidant xüsusiyyətlərə malik antosian maddələri ilə bağlıdır.

Mütəxəssislər bildirirlər ki, dondurulmuş böyürtkən də faydalı xüsusiyyətlərini böyük ölçüdə saxlayır.

5. Quava

Bir stəkan quavada təxminən 36,4 mq maqnezium var.

Bu meyvə C vitamini, lif və antioksidantlarla zəngindir, eyni zamanda aşağı kalorili hesab olunur və uzun müddət toxluq hissi yaradır.

6. Papayya

Bir kiçik papayya təxminən 33 mq maqnezium ehtiva edir.

Meyvə həmçinin həzm üçün faydalı olan papain fermenti ilə zəngindir. Mütəxəssislər bildirirlər ki, papayya xüsusilə həssas həzm sistemi olan insanlar üçün uyğun seçimdir.

Maqnezium niyə bu qədər vacibdir?

Məqalədə vurğulanır ki, müasir qidalanma vərdişləri nəticəsində bir çox insan təbii minerallarla zəngin qidalardan uzaqlaşıb. Emal olunmuş məhsulların artması və yüksək stress səviyyəsi maqnezium balansına mənfi təsir göstərə bilər.

Mütəxəssislər qeyd edirlər ki, hər kəsin dərhal qida əlavələrinə ehtiyacı yoxdur. Bir çox hallarda düzgün qidalanma maqnezium səviyyəsini təbii şəkildə artırmağa kömək edə bilər.

Onların sözlərinə görə, təkcə meyvələr gündəlik maqnezium ehtiyacını tam ödəməsə də, orqanizmə lif, antioksidant və maye təmin etməklə mühüm töhfə verir.

Aydın