"Kir siyasi reallığı anlayır. O, bunu ləyaqətlə və öz seçdiyi şəkildə etmək istəyir. İndi vaxt planını açıqlayacaq”, deyə Nazirlər Kabinetinin üzvlərindən biri bildirib.

Kabinetdəki başqa bir mənbənin sözlərinə görə, istefa ilə bağlı açıqlamanın nə vaxt veriləcəyi hələ dəqiq deyil. Starmerin bəzi yüksək vəzifəli tərəfdarları onun Mekerfilddə keçiriləcək əlavə seçkilərin nəticələri açıqlanana qədər gözləməsini istəyir. Əgər nəticələr gərgin mübarizə və ya Mançester meri Endi Börnhemin məğlubiyyətə yaxın olduğunu göstərsə, onun hələ də qalmaq şansı ola bilər.

Eyni zamanda başqa bir tərəfdar qeyd edib ki, baş nazir risk etmək istəmir və seçkilərin nəticəsini gözləmək "şəxsi baxımdan böyük alçaldılma” ola bilər. Əgər gözləsə və sonra Börnhem qalib gəlsə, bu, Starmeri vəzifədən uzaqlaşdırmış kimi görünə bilər.

Starmer özünü "xəyanət olunmuş” hiss edir

Bazar ertəsi axşamı hökumətdə bir neçə kiçik nazirin istefası ilə başlayan böhran fonunda baş nazir vəziyyətin getdikcə daha da çətinləşdiyini anlayıb. O, bir sıra yüksək vəzifəli nazirlərlə əlaqə saxlayaraq vəziyyəti qiymətləndirməyə və növbəti addımları planlaşdırmağa çalışıb. Lakin ona qarşı aparılan sərt daxili kampaniya Starmeri və onun tərəfdarlarını qəzəbləndirib.

"Onun fikrincə, o, düzgün davranmağa çalışırdı, amma digərləri onu aldatmağa çalışırdı”, deyə mənbə bildirib.

Starmerin tərəfdarlarından birinin sözlərinə görə, onu açıq şəkildə dəstəkləyən iki yüksək vəzifəli nazirin gizlicə öz müşavirlərini deputatları lobbiçilik etməyə göndərərək baş nazirin istefasını tələb etdikləri iddia olunur. Digər nazirlərin isə gələcək hökumətdə vəzifələr üçün rəqib qruplarla danışıqlar apardığı bildirilir.

"Kiri ən çox incidən odur ki, insanlar ona "hələ də səninləyik" deyirdilər. Sonra isə gedib onun əleyhinə olanlarla koordinasiyanı davam etdirirdilər”, deyə mənbə qeyd edib.

Ötən həftə baş nazirin dostlarından biri "DailyMail"ə bildirib ki, Starmer vəziyyətin ağır olmasına baxmayaraq mübarizəni davam etdirəcək:

"Kir inadkardır. O, heç nəyin qəti olmadığını düşünür. Sanki doqquz canı olan pişik kimidir”.

"Amma indi belə deyil. Kier Starmer anlayır ki, onun doqquzuncu – və sonuncu – canı da tükənib”, deyə məqalədə qeyd olunur.

Böyük Britaniyada siyasi böhran

Daha əvvəl bildirilmişdi ki, Leyborist Partiyasının yerli seçkilərdəki ağır məğlubiyyətlərindən sonra Starmer partiya daxilində artan təzyiqlərlə üzləşib. 80-dən çox leyborist deputat onun istefasını tələb edib və ya vəzifədən getməsi üçün vaxt cədvəli açıqlamağa çağırıb.

Partiya daxilində böhran İngiltərə, Uels və Şotlandiyada uğursuz nəticələrdən sonra dərinləşib. Leyboristlər İngiltərənin bələdiyyə şuralarında 1400-dən çox yer itirib, bu vəziyyətdən isə əsasən sağ yönümlü "Reform UK” partiyası faydalanıb.

Aydın