NATO Rusiyanın Baltikyanı ölkələrə mümkün müdaxiləsinə qarşı mübarizə planlaşdırır. Bu çərçivədə Estoniya, Latviya və Litva təxminən 965 kilometr uzunluğunda Rusiya və Belarusla sərhəd boyunca "Baltik müdafiə xətti" adlı müdafiə sistemini hazırlayır.

Qaynarinfo xəbər verir ki, bu barədə The Telegraph məlumat yayıb.

Baltikyanı ölkələr müdafiə planlarını həyata keçirməyə çatdıracaqmı?

Qeyd olunur ki, bu planın əsas elementləri ilk dəfə 2024-cü ilin yanvarında açıqlanıb. Plan çərçivəsində 1000 beton bunkerin tikilməsi nəzərdə tutulur, bunlardan 600-ü Estoniyada yerləşdiriləcək. Həmçinin, bu bunkerləri səngərlər, tank əleyhinə xəndəklər, sursat anbarları və təminat üçün sığınacaqlar tamamlayacaq.

Nəşr vurğulayır ki, tikinti işləri sürətlə gedir. Lakin layihənin tam başa çatması on il çəkə bilər.

"Bizə Rusiyanın təhlükəsinə qarşı hazırlıq üçün on il vaxt lazımdır. Putin isə bizə bu on ili gözləməyə imkan verməyəcək. Baltikyanı ölkələr üçün ən təhlükəli dövr Ukraynada atəşkəs baş verən kimi başlayacaq", – deyə Litvanın sabiq xarici işlər naziri Qabrielyus Landsberqis xəbərdarlıq edib.

The Telegraph həmçinin Danimarka kəşfiyyatının hesabatını xatırladır. Həmin hesabatda qeyd olunur ki, Ukraynadakı müharibə dayandıqdan və ya dondurulduqdan sonra Rusiya sürətlə silahlanmanı bərpa edərək NATO ilə müharibəyə başlaya bilər.

Analitiklərin qiymətləndirməsinə görə, altı ay sonra Rusiya "özünə bitişik ölkədə lokal müharibə" aparmaq imkanına malik olacaq. Proqnoza əsasən, iki il sonra Moskva "Baltik dənizi regionunda bir neçə ölkəyə qarşı regional müharibəyə", beş il sonra isə "Avropada genişmiqyaslı müharibəyə" hazır olacaq.

Bundan əlavə, xatırladılır ki, NATO ölkələri 2023-cü ildə Finlandiya, Polşa və Almaniyadan gücləndirici dəstək xətləri ilə Baltikyanı ölkələrin müdafiəsinə dair plan imzalayıb. Hazırda isə Alyans hər bir Baltikyanı ölkədə dövri əsasda çoxmillətli batalyon qüvvələri yerləşdirir.

Latviyanı Kanada rəhbərliyində beynəlxalq qüvvələr, Litvanı Almaniya briqadası, Estoniyanı isə təxminən 1000 britaniyalı hərbçi qoruyur. Buna baxmayaraq, Tallin, Riqa və Vilnüs Rusiyanın ildırım sürətli hücumundan ehtiyat edir. Ona görə də onlar mövcud döyüş qruplarının döyüşə hazır briqadalarla əvəz olunmasını və NATO-nun daimi mövcudluğunu istəyirlər.

"Bizim strateji dərinliyimiz yoxdur. Ruslar bir neçə saata, ən uzağı bir neçə günə ölkənin içindən keçə bilərlər, buna görə də biz müdafiəyə ilk addımdan başlayırıq. Ukraynaya və onların geri aldıqları şəhərlərə baxın – onlar geri qaytardıqları yerdə bomboş ərazilər gördülər", – deyə Landsberqis izah edib.

Nəşr qeyd edir ki, Ukraynadakı müharibə Baltikyanı ölkələrə dərin müdafiənin və düşmənin hərəkət qabiliyyətinə qarşı mübarizənin nə qədər vacib olduğunu öyrədib.

"Müasir müharibədə böyük üstünlük müdafiədir. Yeni dronlar və peyk çəkilişləri Ukraynada daim yuxarıdan müşahidə imkanı yaradır. Düşmənin mövqeləri hər zaman bilinir. Manevrlərlə aparılan müharibə ölməyib, amma radikal dərəcədə çətinləşib, buna görə də keçilməz istehkamlar yeni əhəmiyyət qazanıb", – deyə Dünya Siyasəti İnstitutunun elmi işçisi Maykl DiKianna bildirib.

Nəşrdə qeyd olunur ki, yeni Baltik müdafiə xətti birbaşa mənada baryer deyil və Fransanın 1930-cu illərdə alman hücumunu dayandırmaq üçün tikdiyi "Majino xətti" ilə müqayisə edilə bilməz.

"Bu, nə divardır, nə də fasiləsiz istehkam xətti. Bu, daha çevik, hərəkətli və müasir müdafiə və caydırıcı vasitədir", – deyə Rand analitik mərkəzinin baş hərbi analitiki Marta Kepe izah edib.

Onun sözlərinə görə, Baltikyanı ölkələrin layihəsinin məqsədi Rusiyanın mümkün müdaxiləsinə müəyyən forma vermək və düşmən qüvvələrini hücum edilə biləcək sahələrə yönəltməkdir.

"Bu, Baltikyanı müdafiənin oxqabındakı daha bir oxdur və özü-özlüyündə passiv şəkildə fəaliyyət göstərə bilməz", – deyə Kepe vurğulayıb.

Bütün narahatlıqlara baxmayaraq, Litvanın müdafiə nazirinin müavini Karolis Aleksa hesab edir ki, Baltik regionu Rusiyanın hücumuna qarşı durmağa hazırdır.

"Biz ilk santimetrdən etibarən müdafiəyə hazırıq, başqa seçimimiz yoxdur", – deyə o, əminliklə bildirib.

Almaniya Rusiyayla həmsərhəd NATO ölkəsində hərbi qüvvələrini yerləşdirməyə başlayıb

Xatırladaq ki, aprelin 1-də Almaniya İkinci Dünya müharibəsindən bəri ilk dəfə daimi xarici hərbi birləşməsini – Litvada yerləşdirilmiş 5000 nəfərlik zirehli briqadanı rəsmi şəkildə istifadəyə verib. Bununla Berlin NATO-nun şərq cinahını gücləndirməyə çalışır.

Yeni yaradılmış 45-ci zirehli briqada Vilnüs yaxınlığında keçirilən mərasim zamanı rəsmi fəaliyyətə başlayıb. Mərasimdə briqadanın müvəqqəti qərargahı yaradılıb, rəmzi təqdim olunub və briqada artıq general-mayor Kristof Huberin komandanlığı altındadır.

Alpər