"Tesla Model 3" — dünyanın ən populyar elektrik avtomobillərindən biri hesab olunur. Nisbətən əlçatan qiyməti və EPA qiymətləndirməsinə görə 363 mil (təxminən 585 km) yürüş məsafəsi onu satış hitinə çevirib. Lakin Model 3 bu göstəricidə rekordçu deyil və bazarda daha uzun məsafə qət edə bilən modellər mövcuddur.

Qaynarinfo xəbər verir ki, bu barədə "SlashGear" yazır.

"Şarj narahatlığı” — yəni elektrik enerjisinin doldurulma məntəqəsindən uzaqda tükənməsi qorxusu — hələ də bir çox sürücünün elektromobilə keçidini ləngidir.

EPA test metodu real sürüş şəraitini tam əks etdirmir: yüksək sürətli magistral yollar, temperatur və sürüş tərzi faktiki yürüş məsafəsinə ciddi təsir göstərir. Buna baxmayaraq, avtomobilləri müqayisə etmək üçün bu göstərici hələ də əsas meyarlardan biridir.

Aşağıda "Tesla Model 3"dən rəsmi olaraq daha böyük yürüş məsafəsinə malik 5 elektrik avtomobili təqdim olunur.

Mercedes-Benz EQS450+ – 390 mil

Alman sedanı 2022-ci ildə debüt edib və həm lüks, həm də yürüş məsafəsi ilə diqqət çəkib. 2025-ci il versiyasında "Mercedes" akkumulyatoru 118 kVt·saatadək böyüdüb və regenerativ əyləcləməni təkmilləşdirib — nəticədə EPA üzrə yürüş məsafəsi 390 milə yüksəlib. "AutoGuide" testlərində hətta 417 mil nəticə qeydə alınıb ki, bu da real şəraitdə rəsmi göstəricini aşan nadir hallardandır.

Rivian R1T Dual – 420 mil

"Rivian" elektrik pikapı "Dual" komplektasiyasında Max akkumulyatoru ilə 420 mil EPA göstəricisinə malikdir. Lakin "Motor Trend" testlərində real yürüş 340 mil olub — bu, nəzərəçarpacaq fərqdir. Qiymət baxımından da fərqlilik böyükdür: "Model 3 Premium" təxminən 42 490 dollardan başladığı halda, "R1T Dual Max" 86 990 dollara başa gəlir. Bunun qarşılığında tam ölçülü elektrik pikap əldə olunur.

Cadillac Escalade iQ – 465 mil

Nəhəng SUV 205 kVt·saatlıq batareya və 465 mil yürüş məsafəsi ilə təqdim edilir. Böyük ölçülərinə baxmayaraq, "Motor Trend" testlərində 415 mil nəticə göstərib ki, bu sinif üçün yüksək göstəricidir. İki elektrik mühərriki 750 a.g. güc hasil edir və avtomobili 0-dan 100 km/saata 4,5 saniyəyə sürətləndirir. Qiymət 130 000 dollardan başlayır.

Chevrolet Silverado EV Work Truck – 493 mil

Kult pikapın elektrik versiyası olan "Silverado EV Work Truck Max Range" batareyası ilə 493 mil EPA göstəricisinə çatır. "Edmunds" testlərində isə 539 mil nəticə qeydə alınıb — bu, rəsmi rəqəmdən xeyli yüksəkdir. 205 kVt·saatlıq batareya LT və "Trail Boss" versiyalarında da mövcuddur.

Lucid Air Grand Touring – 516 mil

Siyahının lideri Arizonada istehsal olunan premium sedan "Lucid Air Grand Touring"dir. Standart 19 düymlük disklərlə EPA üzrə 516 mil yürüş məsafəsi bu gün bazarda ən yüksək rəsmi göstəricidir. "Car and Driver" testlərində 410 mil real nəticə əldə edilib. Avtomobilin qiyməti 110 000 dollardan yuxarıdır.

Aydın