Azərbaycan jurnalistikasının parlaq simalarından biri, gözəl iqtisadi fikirləri ilə tanınan, sənaye və əmək mövzularına sadiq bir aydın – Kamil Adil oğlu Quliyev – 1948-ci il aprelin 25-də Qərbi Azərbaycanın Qafan rayonunda dünyaya göz açıb. Uşaqlıq və gənclik illərini zəhmət və əzmkarlıqla keçirən Kamil müəllim həyatının bütün mərhələlərində təvazökarlıq, zəhmətsevərlik və ideyaya bağlılıq nümunəsi olub.

1963-cü ildə kənddəki səkkizillik məktəbi bitirib, Bakıya üz tutaraq 182 nömrəli məktəbdə təhsilini davam etdirib. 1969–1974-cü illərdə Azərbaycan Dövlət Universitetinin jurnalistika fakültəsində oxuyub və təhsilini fərqlənmə diplomu ilə başa vuraraq bu sahəyə elmli və hazırlıqlı bir gənc kimi qədəm qoyub.

Lakin Kamil Quliyev yalnız qələmlə deyil, alın təri ilə də yoğrulmuş bir insan idi. O, gənc yaşlarında Azneftprommaş, B.Sərdarov maşınqayırma zavodu və Azneft İstehsalat Birliyində usta köməkçisi, gənc çilingər, mühafizəçi, növbə rəisi və digər texniki sahələrdə çalışaraq həyatın içindən keçmişdi. Bu zəhmətkeş illər onun jurnalistikasına real həyat nəfəsi, sənaye düşüncəsi və iqtisadi təhlil ruhu qazandırmışdı.

1976–1987-ci illərdə Azərbaycan Radiosunun "Araz" redaksiyasında kiçik redaktor və redaktor, sonrakı illərdə isə Təbliğat redaksiyasında şərhçi (1988–1990), studiya direktorunun müavini (1991–1995), "Xəbərlər" və ictimai-siyasi proqramlar redaksiyasında böyük redaktor (1995–2007) vəzifələrində çalışıb. "Günün nəbzi” və iqtisadiyyat verilişlərinin həm aparıcısı, həm də redaktoru kimi tamaşaçıya bilik və düşüncə təqdim edən Kamil Quliyev Azərbaycan ictimai fikrinin formalaşmasında özünəməxsus yer tutub.

SSRİ maarif əlaçısı döş nişanı,Qızıl qələm mükafatı, Araz mükafatı kimi təltiflər onun əməyinə verilən qiymətin yalnız simvolik göstəriciləridir. Ən böyük mükafatı isə xalqın yaddaşında yaşayan hörməti və televiziya tarixində qalan izidir.

2007–2009-cu illərdə "Azərbaycan Televiziya və Radio Verilişləri” QSC-də katibliyin rəisi vəzifəsini icra edən Kamil müəllim həm də uzun illər boyu AzTV-də fəaliyyət göstərmiş həyat yoldaşı – Taqiyeva Lətifə Həsən qızı ilə çiyin-çiyinə çalışaraq ölkənin informasiya məkanında bir ailə olaraq xidmət göstərmişdi.

O, 2009-cu ilin mayında televiziya fəaliyyətini başa vurdu, lakin onun səsi, fikirləri, sənaye və iqtisadiyyata dair təhlilləri hələ uzun illər yaddaşlardan silinmədi. Təəssüf ki, bu parlaq şəxsiyyət 2015-ci il fevralın 22-də dünyasını dəyişdi.

Kamil Quliyev öz təvazökarlığı, zəhmətə bağlılığı və dərin iqtisadi təfəkkürü ilə təkcə jurnalist deyil, həm də sənaye cəmiyyətinin ideya daşıyıcısı idi. O, mikrofon arxasından deyil, xalqın içindən danışır, iqtisadiyyatı təkcə rəqəmlərlə yox, insan taleləri ilə izah edirdi.

Bu gün, onun anadan olmasının 77-ci ilində, Kamil müəllimin xatirəsini ehtiramla yad edir, jurnalistikanın və sənayenin inkişafına verdiyi töhfəni minnətdarlıqla xatırlayırıq.

Həqiqi sənaye düşüncəsinin səsi olmuş Kamil Quliyev – Sizin iziniz Azərbaycan mediasında yaşayır.