Müasir əmək bazarında rəqabətin artması iş axtaranlar üçün qaydaları daha da sərtləşdirib. Bir çox insan iş tapmaqda çətinlik çəkdiyi üçün müsahibəyə dəvət almaq artıq böyük uğur sayılır. Lakin uyğun maaşla iş əldə etmək üçün yalnız peşəkar bacarıqlar deyil, düzgün strategiya da vacibdir.

Qaynarinfo-nun məlumatına görə, cinayət hüququ üzrə vəkil Ceremi Rozental "Your Tango” nəşrinə müsahibəsində bildirib ki, iş görüşündə heç vaxt cavab verilməməli olan bir sual var və bu, maaş gözləntiləri ilə bağlıdır.

Onun sözlərinə görə, müsahibə zamanı "Bu vəzifədə işləmək üçün hansı maaşı gözləyirsiniz?” kimi suallara birbaşa cavab vermək düzgün deyil.

Vəkil izah edib ki, belə suallar işəgötürənə namizəd haqqında çox məlumat verir. Bu, şəxsin əmək bazarında necə davrandığını, şirkət və vakansiya barədə nə qədər araşdırma apardığını, eləcə də öz dəyərini necə qiymətləndirdiyini göstərir.

Rozental qeyd edib ki, insanların böyük əksəriyyəti maaş gözləntilərini olduğundan aşağı göstərir. Bu isə şirkətlərə əməkdaşlara daha az maaş təklif etməyə imkan yaradır və işə qəbul üzrə məsul şəxslərin büdcəyə qənaət etdiyini göstərir.

Başqa sözlə, işəgötürən sizin özünüzü aşağı qiymətləndirdiyinizi görərsə, sizə haqq etdiyinizdən daha az maaş verməyə maraqlı olur.

Maaş sualına cavab risklidir

İş müsahibəsində standart sayılan suallardan yayınmaq ilk baxışdan məntiqsiz görünə bilər. Lakin Rozentalın sözlərinə görə, maaş barədə cavabınız istəmədən sizin haqqınızda əlavə məlumat ortaya çıxara bilər.

Karyera üzrə məşqçi Cennifer Herriti bildirib ki, işəgötürənlər maaş gözləntilərini öyrənməklə həm büdcənin uyğunluğunu yoxlayır, həm də namizədin özünü qiymətləndirmə və danışıq aparmaq bacarıqlarını test edirlər.

"Harvard Business Review” nəşrinin məşğulluq üzrə eksperti Emi Qallo isə xəbərdarlıq edib:

"Əgər çox aşağı məbləğ desəniz, şirkətin əslində ödəməyə hazır olduğu məbləğdən daha az qazana bilərsiniz. Çox yüksək rəqəm söyləsəniz isə, iş şansınızı itirə bilərsiniz”.

Ekspertlər hesab edirlər ki, bu vəziyyətdən çıxış yolu mövcuddur və düzgün yanaşma ilə həm maaş mövzusundan yayınmaq, həm də müsahibədə müsbət təəssürat yaratmaq mümkündür.

Maaş barədə suala cavab verməmək strategiyası

Rozentalın fikrincə, ən yaxşı üsullardan biri konkret rəqəm və ya maaş aralığı göstərməkdən yayınmaqdır.

O bildirib ki, namizəd maaş məsələsinin şəxsi mövzu olduğunu deyəndə bu, müsahibə aparan şəxsdə müsbət təsir yaradır və həmin insanın öz dəyərini bildiyini göstərir.

Digər tövsiyə isə söhbəti başqa istiqamətə yönəltməkdir. Emi Qallo məsləhət görür ki, namizəd şirkətin bu vəzifə üçün nəzərdə tutduğu maaş aralığını soruşsun.

Əgər işəgötürən bunun namizədin gözləntilərinə uyğun olub-olmadığını soruşarsa, birbaşa cavab vermək əvəzinə danışıqlar imkanını iş təklifindən sonra müzakirə etməyin mümkün olub-olmadığını öyrənmək tövsiyə olunur.

Ekspertlər əlavə edirlər ki, namizəd maaş mövzusundan öz peşəkar bacarıqları və təcrübəsi barədə danışmağa keçə bilər. Bu yanaşma dolayısı ilə insanın öz dəyərini bildiyini nümayiş etdirir.

Məqalədə vurğulanır ki, əmək bazarında vəziyyət çətin olsa da, belə peşəkar məsləhətlər iş axtaranlara özlərini daha inamlı hiss etməyə kömək edə bilər.

Aydın