ABŞ prezidenti Donald Trampın ətrafından dörd yüksəkvəzifəli şəxs "Batkivşina" partiyasının lideri Yuliya Timoşenko və Petro Poroşenkonun "Avropa Həmrəyliyi" partiyasının üzvləri ilə gizli danışıqlar aparıb.

Qaynarinfo xəbər verir ki, bu barədə Politico üç ukraynalı deputata və Respublikaçılar Partiyasının xarici siyasət üzrə ekspertinə istinadən yazır.

"Donald Trampın ətrafından dörd yüksək vəzifəli şəxs Kiyevdə Vladimir Zelenskinin əsas siyasi rəqibləri ilə gizli görüşlər keçirib. Bu görüşlər ABŞ-ın Moskva ilə birləşərək Ukrayna prezidentini vəzifəsindən kənarlaşdırmağa çalışdığı bir vaxtda baş tutub”, - mənbə qeyd edib.

Trampın yaxın adamlarının Timoşenko və Poroşenkonun yüksək vəzifəli nümayəndələri ilə görüşlərində Ukraynada növbədənkənar prezident seçkilərinin keçirilməsi məsələsi müzakirə olunub. Politico yazır ki, Trampın köməkçiləri, cəmiyyətin müharibədən yorulması və korrupsiyadan narazılığı səbəbindən Zelenskinin hər hansı seçkidə məğlub olacağına əmindirlər.

Nəşrin məlumatına görə, Zelenskinin populyarlığı son illərdə azalsa da, Oval kabinetdəki mübahisədən sonra onun reytinqi artıb. Son sorğular göstərir ki, o, hələ də prezident yarışında inamla liderdir.

ABŞ administrasiyasının rəsmi mövqeyinə görə, Tramp Ukraynanın daxili siyasətinə qarışmır. Lakin Politico yazır ki, Tramp və onun komandası bunun əksini sübut edən addımlar atır. O, Zelenskini "seçkilərsiz diktator” adlandırıb, ABŞ Milli Kəşfiyyat İdarəsinin rəhbəri Tulsi Qabbard isə əsassız olaraq Kiyevi seçkiləri ləğv etməkdə ittiham edib.

Sosioloji sorğular və əsas rəqiblər:

Böyük Britaniyanın Survation şirkətinin son sorğusuna görə:

- 44% respondent prezident seçkilərində Zelenskini dəstəkləyəcək.

- Onun əsas rəqibi Valeri Zalujnıdır (Ukraynanın Böyük Britaniyadakı səfiri, keçmiş Silahlı Qüvvələr Komandanı), o, Zelenskidən 20 faiz bəndi geridədir.

- Poroşenko yalnız 10%,

- Timoşenko isə 5,7% dəstək alıb.

Seçkilərin vaxtı və Kremlin mövqeyi:

Politico qeyd edir ki, bütün qapalı müzakirələrin əsas mövzusu prezident seçkilərinin müvəqqəti atəşkəsdən sonra, lakin tammiqyaslı sülh danışıqlarından əvvəl keçirilməsidir. Kreml də illərdir Zelenskidən qurtulmaq istədiyinə görə bu ideyanı dəstəkləyir.

Timoşenko və Poroşenko isə ictimai şəkildə müharibə bitmədən seçkilərin keçirilməsinə qarşı olduqlarını bildiriblər. Kiyev meri Vitali Kliçko da eyni mövqeni bölüşür.

Bununla belə, aparıcı respublikaçı xarici siyasət eksperti Politico-ya bildirib ki, "Poroşenkonun və Timoşenkonun adamları Trampın ətrafı ilə müzakirələr aparır, özlərini ABŞ-la daha rahat işləyə biləcək şəxslər kimi təqdim edirlər. Onlar, Zelenskinin qəbul etmədiyi bir çox məsələləri qəbul etməyə hazır olduqlarını bildirirlər”.

Reaksiyalar:

- Timoşenkonun sözçüsü Natalya Lısova Politico-nun sorğusuna cavab olaraq "Biz hələlik bunu şərh etməyəcəyik” deyib.

- Poroşenkonun "Avropa Həmrəyliyi" partiyası isə bildirib ki, onların məqsədi seçkilərin keçirilməsində israr etmək deyil, müharibədən sonra azad və ədalətli seçkilərin təmin olunmasıdır.

Politico Trampın ətrafından gizli görüşlərdə iştirak edən dörd şəxslə əlaqə saxlayıb, lakin hələlik cavab ala bilməyib.

Alpər