Oğuzda örüş sahəsinin zəbt edildiyi iddia edilir (VİDEO)

 

Onların sözlərinə görə, kəndin Qaratorpaq istiqamətində olan dağlıq ərazidən həmişə otlaq sahəsi kimi istifadə ediblər, lakin hazırda həmin ərazinin 87 hektarını Şəkidən olan fermer alıb və orada heyvandarlıq təsərrüfatı yaratmaq istəyir.

Sakinlər bildirirlər ki, otlaq yeri olmadığından heyvan saxlamaq onlar üçün problemə çevrilib.

Çaldaş kənd inzibati ərazi dairəsi üzrə nümayəndə Elçin Babayev sorğumuza cavab olaraq bildirdi ki, sakinlərin qeyd etdiyi əraziyə qədər olan, kənddən təxminən 1 kilometr məsafədə yerləşən sahə Çaldaş kəndinin örüş ərazisidir və Oğuz rayonunun Çaldaş kəndinə aiddir. Onun sözlərinə görə, sözügedən 87 hektarlıq sahə isə onlara məxsus deyil və Şəki rayonunun Qaratorpaq kəndi ərazisinə daxildir.

Qaratorpaq sakini Natiq Məmmədov isə həmin sahəni 2022-ci ildən icarəyə götürdüyünü təsdiqləyən rəsmi sənədi təqdim edib. O bildirib ki, sakinlərin narazılığı səbəbindən yenidən ödəniş edərək, onların iştirakı ilə kadastr ölçüləri aparılıb və ərazinin sərhədləri dəqiqləşdirilib. Natiq Məmmədovun sözlərinə görə, Çaldaş kəndinin 3 sakini Qaratorpaq kəndindən 500 hektar örüş sahəsi icarəyə götürüb. O, öz sahəsini həmin şəxslərlə ölçüyə uyğun dəyişməyi də təklif etdiyini, lakin sakinlərin bununla razılaşmadığını bildirib.

Natiq Məmmədov onu da əlavə edib ki, problemlə bağlı hüquq-mühafizə orqanlarına müraciət edib.//Xəzər TV