Azərbaycanlı tələbə ABŞ-da ən böyük VR hakatonlarından birinə rəhbərlik etdi (FOTO)

Qaynarinfo-nun məlumatına görə, üç gün ərzində keçirilən "ImmerseGT 2025" tədbiri 50-dən çox universitetdən və 10-dan çox ölkədən 350-dən artıq qeydiyyatdan keçmiş iştirakçını bir araya gətirib. Tədbir Georgia Texnologiya İnstitutunda baş tutub və müasir seminarlar, texnologiya nümayişləri, mentorluq sessiyaları və yenilikçi layihələrin təqdimatı ilə yadda qalıb. 

"ImmerseGT" bu il dünyanın ən böyük immersiv texnologiya hackathonlarından birinə çevrilib. 

"Immerse texnologiyanın universitetində və dünyada daha geniş yayılmasını görmək məni inanılmaz dərəcədə həyəcanlandırır. Belə qlobal bir təşəbbüsə Azərbaycanlı olaraq rəhbərlik etmək mənim üçün böyük əhəmiyyət daşıyır, bizim gəncliyin yüksək səviyyəli innovasiyalara rəhbərlik edə biləcəyini göstərməkdir", deyə İlkin Məmmədli bildirib.

İlkin Məmmədlinin rəhbərliyi altında "ImmerseGT" 50,000 ABŞ dollarından çox maliyyə vəsaiti, mükafatlar və texniki avadanlıq toplayıb. Tədbirə sponsorluq edən şirkətlər arasında "Snap Inc.", "Niantic", "MeshyAI" və "Georgia Tech CREATE-X" kimi milyard dollarlıq texnoloji nəhənglər yer alıb. Bu şirkətlər hələ ictimaiyyətə təqdim olunmamış texnologiyalarını bu tədbirdə nümayiş etdiriblər. "Major League Hacking", "Reboot Imagine", "GroKit", CELSIUS, AWE və VR/AR@MIT kimi qlobal tərəfdaşlar da tədbirin uğurunda mühüm rol oynayıblar.

"Hakatonlar saf innovasiya üçün bir mühit yaradır - burada üç gün ərzində müxtəlif təcrübələrə malik insanlar bir araya gələrək əməkdaşlıq edir və dünyanı dəyişə biləcək texnologiyalar qururlar", deyə İlkin Məmmədli bildirib.

İlkin Məmmədli həmçinin Georgia Tech-in VR tələbə təşkilatının prezidentidir və universitində sahibkarlıq və innovasiyanın inkişafında mühüm rol oynayır. Onun rəhbərliyi altında "ImmerseGT" VR və süni intellekt sahəsində qlobal miqyasda tanınan bir mərkəzə çevrilib və bir sıra layihələr startap investisiyası əldə edib.

Azərbaycan üçün İlkinin uğuru ölkənin qlobal innovasiya sahəsində artan rolunu nümayiş etdirir. VR və süni intellekt kimi texnologiyalar səhiyyədən təhsilə qədər bir çox sahəni yenidən formalaşdırdığı bir vaxtda, Azərbaycan gəncləri bu gələcəyə liderlik etməyə hazır olduqlarını sübut edirlər.

Qeyd edək ki, İlkin Məmmədli iş adamı və "Parni iz Baku" KVN komandasının keçmiş direktoru Pərviz Məmmədovun oğludur.