Müasir müharibənin açarı sürətli zərbələrdən qoşun daşınmasına qədər kompleks tədbirlərdə gizlənir. Bu məqsədlə dünyada "Chinook" kimi güclü və "V-22 Osprey" kimi yüksək texnologiyalı helikopterlər yaradılıb.

Qaynarinfo "Wionews" nəşrinə istinadən xəbər verir ki, bu helikopterlərin hamısı yalnız gücə deyil, həm də sürətə görə hazırlanıb.

Boeing CH-47F Chinook

"Boeing" tərəfindən istehsal edilən CH-47F "Chinook" dünyanın ən sürətli hərbi helikopterlərindən biridir. Onun maksimal sürəti 315 km/saat təşkil edir. Bu model 1960-cı illərdən silahlanmadadır. İki rotor sistemi quyruq rotoru ehtiyacını aradan qaldırır, bu da sürəti və qaldırma qüvvəsini artırır. Helikopter 55 əsgər və ya 10 886 kiloqram yük daşıya bilir.

Bell Boeing V-22 Osprey

V-22 ənənəvi helikopter deyil, əyilə bilən rotorlu təyyarədir. O, həm helikopterin qaldırma gücünü, həm də təyyarənin sürətini birləşdirir. 509 km/saat sürətə çataraq hərbi nəqliyyat üçün istifadə edilən ən sürətli rotor aparatıdır. "Osprey" ABŞ Dəniz Piyadaları, Hərbi Hava Qüvvələri və Hərbi Dəniz Qüvvələri tərəfindən qoşun və avadanlıq daşınmasında istifadə olunur.

Westland Lynx

Britaniyanın "Westland Lynx" helikopteri 1986-cı ildə 400,9 km/saat sürətlə helikopterlər arasında dünya sürət rekordunu qırmışdı. Dənizdə və quru əməliyyatlarında istifadə üçün hazırlanmış bu model sonradan NH90 ilə əvəzlənib, lakin öz dövrünün ən qabaqcıl Britaniya helikopterlərindən biri kimi qalır.

Sikorsky X2

"Sikorsky X2" eksperimental helikopter sınaq uçuşları zamanı 460 km/saat sürətə çatıb. Onun qoşa oxlu rotoru və arxada yerləşən itələyici pəri hava müqavimətini azaldaraq sürəti artırır. Bu aparat silahlanmaya qəbul edilməsə də, "S-97 Raider" – kəşfiyyat və xüsusi əməliyyatlar üçün nəzərdə tutulan helikopterin əsasını təşkil edib.

Mi-35M

Mi-35M, Mi-24 "Hind" modelinin müasirləşdirilmiş versiyasıdır. Maksimal sürəti 310 km/saat olan bu helikopter həm yerüstü hədəflərə zərbə endirə, həm də səkkiz əsgər daşıya bilir. İki mühərrik və ağır silah sistemi onu hücum və nəqliyyat əməliyyatları üçün mühüm vasitəyə çevirir.

Boeing AH-64E Apache

"Boeing AH-64E Apache Guardian" ən müasir döyüş helikopterlərindən biridir. 293 km/saat sürətlə uçur, "Hellfire" raketləri və qabaqcıl avionika ilə təchiz olunub. "Apache" ABŞ, Böyük Britaniya və Hindistan da daxil olmaqla bir neçə ölkə tərəfindən istifadə olunur.

AW109 LUH

"Leonardo" şirkətinin istehsal etdiyi yüngül çoxməqsədli AW109 helikopteri 282 km/saat sürətə malikdir. İki "Turbomeca" mühərriki sayəsində yüksək qalxma qabiliyyəti və manevr imkanına sahibdir. Bu helikopter Cənubi Afrika və Malayziya kimi ölkələrin orduları tərəfindən yüngül nəqliyyat, patrul və xilasetmə əməliyyatlarında istifadə edilir.

Mi-26 "Halo"

Mi-26 dünyanın ən böyük və ən güclü helikopteri olaraq qalır. Onun maksimal sürəti 295 km/saat təşkil edir. 1970-ci illərin sonlarından istismardadır və 20 tonadək yük qaldıra bilir. Böyük ölçülərinə baxmayaraq, bu helikopter ağır yük daşınması və təbii fəlakətlər zamanı yardım missiyalarında yüksək sürətini qoruyur.

Aydın