İnternet istifadəçiləri artıq süni intellektdən təkcə ev tapşırıqları hazırlamaq və ya kod yazdırmaq üçün deyil, birbaşa şəfa tapmaq ümidi ilə də istifadə edirlər. "OpenAI” tərəfindən paylaşılan yeni hesabat göstərir ki, ChatGPT hər həftə milyardlarla mesaj alır və onların çox böyük hissəsi sağlamlıq mövzuları ilə bağlıdır.

Təxminən 800 milyon daimi istifadəçidən 200 milyonu həftədə ən azı bir dəfə süni intellektə sağlamlıqla bağlı sual verir. Gündəlik göstəricilərə baxdıqda isə 40 milyondan çox insan həkimə getməzdən əvvəl botla məsləhətləşməyə üstünlük verir.

Xəstəxana uzaq, xərclər yüksəkdir

İnsanların niyə səhiyyə mütəxəssisi əvəzinə süni intellekti seçdiyi sualının cavabı sistemdəki tıxaclarla izah olunur. İstifadəçilərin yarıdan çoxu ChatGPT-dən simptomları yoxlamaq və ya mürəkkəb tibbi terminləri anlamaq üçün yararlanır. Xüsusilə ABŞ kimi səhiyyə sisteminin bahalı və əlçatan olmadığı bölgələrdə bu, bir növ çıxış yoluna çevrilib.

Araşdırmaya görə, sağlamlıqla bağlı yazışmaların böyük əksəriyyəti klinikaların bağlı olduğu saatlarda baş verir. Daha diqqətçəkən məqam isə ən yaxın xəstəxanaya yarım saatdan çox məsafədə yaşayan insanların süni intellektdən xeyli daha intensiv istifadə etməsidir.

Həyati təhlükə: ChatGPT tövsiyəsi ilə xəstəxanalıq olanlar var

Süni intellekt səhiyyə sahəsində böyük potensial vəd etsə də, bu sahədə səhvlərin qiyməti olduqca ağır ola bilər. Digər mövzularda yanlış məlumat verən bir bot bəzən gülməli görünsə də, səhiyyədə bu, həyat və ölüm məsələsinə çevrilir.

Yaxın vaxtlarda baş verən hadisələrdən birində 60 yaşlı xəstənin ChatGPT-nin tövsiyə etdiyi bir qida əlavəsini qəbul etdikdən sonra bromid zəhərlənməsi ilə xəstəxanaya yerləşdirilməsi təhlükənin miqyasını ortaya qoyub. Mütəxəssislər mövcud texnologiyanın heç vaxt həkimi əvəz edə bilməyəcəyini və öz-özünə diaqnoz qoymağın böyük risk daşıdığını vurğulayırlar.

Ağ Ev və texnologiya nəhəngləri prosesə qoşulur

Bu nəzarətsiz artım hökumətləri və tənzimləyici qurumları da hərəkətə gətirib. Tramp administrasiyası "Sağlamlıq texnologiyalarını yenidən möhtəşəm edək” adlı tədbirlə süni intellekt köməkçilərinin pasiyentlərə qulluqda istifadəsi üçün özəl sektorla əməkdaşlıq edəcəyini açıqlayıb. "OpenAI”ın icraçı direktoru Sem Altmanın da qatıldığı bu təşəbbüs amerikalıların tibbi qeydlərinin müxtəlif tətbiqlər arasında paylaşılmasını da nəzərdə tutur.

"OpenAI” isə öz yol xəritəsini hazırlayaraq süni intellekt dəstəkli tibbi cihazlar üçün daha aydın və sadələşdirilmiş hüquqi proses tələb edir. Şirkət yaxın aylarda səhiyyə sahəsində süni intellektin necə nəzarət altına alınmalı olduğuna dair genişmiqyaslı siyasət layihəsi dərc etməyə hazırlaşır.

Aydın