Avtonom avtomobillərin əsas texnologiyalarından sayılan "Lidar" sensorlarını istehsal edən "Luminar" çətin ayların ardından ABŞ-da iflas qorunması üçün müraciət edib.

Qaynarinfo xəbər verir ki, şirkət üçün bu addım aylarla davam edən ixtisarların, yüksək vəzifəli rəhbərlərin gedişinin və ən böyük müştərisi "Volvo” ilə yaşanan hüquqi qarşıdurmanın dramatik nəticəsi kimi qiymətləndirilir.

2020-ci ildə tərs birləşmə yolu ilə birjaya çıxdıqda bazar dəyəri 3 milyard dollardan çox olan "Luminar” iflas prosesi çərçivəsində əsas "Lidar" biznesini satmağı hədəfləyir. Şirkət artıq yarımkeçirici törəmə qurumunun satışı ilə bağlı razılaşma əldə edib. Təchizatçılar və müştərilər üçün "fasilələri minimuma endirmək” məqsədilə iflas prosesi boyunca fəaliyyətini davam etdirəcəyini bildirən şirkət, proses tamamlandıqdan sonra "Luminar”ın mövcudluğunun sona çatacağını qeyd edir.

"Luminar”ın icraçı direktoru Pol Riççi açıqlamasında bildirib: "Alternativlərimizi hərtərəfli nəzərdən keçirdikdən sonra, idarə heyətinin nəzarəti altında satış prosesinin ən doğru yol olduğuna qərar verdik".

Riççi bu mərhələdə də əsas prioritetlərinin müştərilərin gözlədiyi keyfiyyət, etibarlılıq və xidmət səviyyəsini qorumaq olduğunu vurğulayıb.

Texas Cənub Bölgəsində edilən iflas müraciəti şirkət üçün son dərəcə çalxantılı keçən bir ilin sonuna təsadüf edir. Qurucu Ostin Rassell may ayında "iş etikası və davranış qaydaları üzrə aparılan araşdırma”dan sonra qəfil şəkildə icraçı direktor vəzifəsindən istefa verib, lakin idarə heyətində qalıb. Rassell oktyabr ayında "Russell AI Labs” adlı yeni təşəbbüs yaradıb və "Luminar”ı tam şəkildə satın almaq üçün təklif irəli sürüb.

Bu müddətdə şirkətdə sarsıntılar davam edib. "Luminar” il ərzində ikinci kütləvi ixtisar dalğasını həyata keçirərək işçi heyətinin 25 faizini azaldıb. Maliyyə direktoru vəzifəsindən ayrılıb, şirkət bir neçə kredit ödənişi üzrə defolta düşüb və ABŞ Qiymətli Kağızlar və Birjalar Komissiyası araşdırmaya başlayıb. Oktyabr ayında bir ofislə bağlı təxliyə iddiası ilə üzləşən şirkət, noyabrda isə başqa bir ofis icarəsindən çıxıb.

Şirkət üçün ən böyük zərbə noyabr ayında yaşanıb. "Luminar”ın ilk tərəfdaşlarından və bu ilin əvvəlinə qədər ən böyük müştərisi olan "Volvo” Lidar istehsalçısı ilə bağlanmış beşillik müqaviləni ləğv edib. Müqavilənin pozulmasından sonra "Luminar” "Volvo”ya qarşı hüquqi addım atdığını açıqlayıb. Bununla yanaşı, şirkət sensorların istehsalını həyata keçirən müqaviləli istehsalçı tərəfindən açılmış ayrı bir məhkəmə iddiası ilə də üz-üzədir.

İflas müraciəti sənədlərinə əsasən, "Luminar”ın aktivləri 100–500 milyon dollar arasında, öhdəlikləri isə 500 milyon–1 milyard dollar aralığındadır. Bu öhdəliklərə məlumatların etiketlənməsi üzrə əməkdaşlıq etdikləri "Scale AI”yə 10 milyon dollar, süni intellekt proqram təminatı şirkəti "Applied Intuition”a isə 1 milyon dollardan çox borc daxildir.

Aydın