Müasir dünyada demək olar ki, hər ailənin bir avtomobili var. Tələbin bu qədər yüksək olması bazarda böyük müxtəliflik yaradıb. Lakin eyni qiymət aralığında olan avtomobillər keyfiyyətcə bir-birindən çox fərqlənir. Təcrübəli avtomobil sahibləri artıq çoxdan müəyyən modelləri "heç vaxt almaram” siyahısına salıblar – səbəb isə onların tez-tez xarab olması və korroziyaya meyilliliyidir.

Qaynarinfo xəbər verir ki, 2025-ci ildə istehsal olunan avtomobillər arasında almaqdan çəkinməyə dəyən modellər barədə "Consumer Reports nəşri yazıb.

1. Ford Escape Hybrid (2025)

Model aşağı yanacaq sərfiyyatı ilə populyarlıq qazanıb, lakin bu üstünlük nöqsanları ört-basdır etmir. Salon dəridən deyil, parça və vinildən hazırlanıb, plastik hissələr çoxdur – bu da ucuz təsir bağışlayır. İstifadə izləri tez görünür. İlin əvvəlində 20 000-dən çox avtomobil batareya qüsurlarına görə geri çağırılıb. Yağ sızması və geri baxış kamerasının tərs görüntü verməsi kimi problemlər də qeydə alınıb.

2. Nissan Pathfinder (2025)

İyun ayında istehsalçı 250 000-dən çox Pacifica və Voyager modelini, o cümlədən bu seriyaya aid avtomobilləri, nasaz yan hava yastıqlarına görə geri çağırıb. İkinci oturacaq sırasındakı yer azalıb, bu da uzun səfərlərdə narahatlıq yaradır. Texniki problemlərlə birlikdə bu amillər modelin etibarlılığını şübhə altına alır.

3. Chevrolet Blazer EV (2025)

Əvvəlki versiyada proqram təminatı və konstruksiya etibarlılığı ilə bağlı ciddi problemlər var idi. 2025 versiyası bir qədər yaxşılaşsa da, elektron əyləc sistemində nasazlıqlar aşkar olunub. Avtomobil ötürməni "park” rejimindən çıxarmaqda problem yaradır, sürücülər servis xəbərdarlıqlarının daimi çıxmasından şikayət edirlər.

4. Volkswagen Jetta (2025)

Dizayn baxımından daha cəlbedici olsa da, salon hələ də əsasən plastiktən ibarətdir. Eyni 1,5 litrlik 158 a.g.-lik mühərrik qalıb, bu da rəqiblərdən zəifdir. Mexaniki ötürmə yalnız GLI versiyasında var. Sükan sistemi geri əlaqə vermir, dinamika isə zəifdir.

5. Mercedes-Benz C-Class (2025)

Əyləc sistemi gec və yumşaq reaksiya verir, bəzi hallarda avtomatik əyləc əsassız şəkildə işə düşür, bu da qəza riskini artırır. Sükan idarəetməsi qeyri-dəqiqdir. Salon bir qədər genişlənsə də, baş hissədə daralma uzunboylu sərnişinləri narahat edir.

6. Chrysler Pacifica / Voyager (2022–2025)

Yan hava yastıqları ilə bağlı təhlükəsizlik problemi səbəbindən 250 000-dən çox avtomobil geri çağırılıb. Elektron sistemlərdə nasazlıqlar və ötürmədə sarsıntılar barədə çoxlu şikayətlər var.

7. Jeep Grand Cherokee (2025)

Güclü mühərrikinə baxmayaraq, ötürmə qutusu və asqı sistemində sabit problemlər müşahidə olunur. Elektron idarəetmə sistemləri tez-tez səhv mesajları verir. Yüksək yanacaq sərfiyyatı və bahalı servis xərcləri bu modeli ailə avtomobili kimi əlverişsiz edir.

Nəticə:

Populyarlıq heç də etibarlılıq demək deyil. 2025-ci ilin bəzi məşhur modelləri dizayn və marketinq baxımından cazibədar görünə bilər, lakin uzunmüddətli istismar zamanı bahalı təmir və narazılıqla üzləşmək riski böyükdür. Alışdan öncə real test nəticələrini və müstəqil reytinqləri diqqətlə öyrənmək vacibdir.

Alpər