ABŞ-ın yüksək vəzifəli məmurlarının Signal çatlarından məxfi məlumatların sızdırılması ilə bağlı qalmaqal yeni detallar qazanır. KİV-in məlumatına görə, bu çatlardan birində Ukraynadakı müharibə müzakirə olunub.

Qaynarinfo xəbər verir ki, demokrat senator Adam Şiff Foreign Policy-yə müsahibəsində bildirib ki, ruslar bu mövzuda məxfi informasiyaya çıxış əldə edə bilərdilər.

O, hesab edir ki, bu sızma qalmaqalı—"Signalgate"—müstəqil baş inspektorun təyin olunması ilə Konqres tərəfindən araşdırılmalıdır. Çatın iştirakçısı olmuş heç bir məmur bu araşdırmaya müdaxilə etməməlidir.

Eyni zamanda, bir çox cavabsız suallar var və ən vacib məsələ ondan ibarətdir ki, bu cür nə qədər başqa çatlar müdafiəsiz kommersiya proqramında mövcud olub? Ehtimal etmək olar ki, bəzi danışıqlara kibercinayətkarlar və ya xarici xüsusi xidmət orqanları daxil ola biliblər.

Açıq şəkildə ABŞ-ın Yəməndə endirdiyi zərbələrə dair məlumatlar sızdırılıb. Bununla yanaşı, ehtimal olunur ki, Yəməndəki agentlər və əməliyyatı planlaşdırmağa kömək edən digər mənbələr ifşa olunub. Nəticədə ABŞ-ın husilərə qarşı gələcək hərbi əməliyyatları təhlükə altına düşüb.

"Daha geniş mənada, bizim müttəfiqlərimiz bu hadisəyə nəzər yetirməli və bir daha düşünməlidirlər ki, Tramp administrasiyasına məxfi kəşfiyyat məlumatlarını etibar etmək olmaz, çünki onlar bu informasiyaya ehtiyatsız yanaşırlar. Mən, həmçinin narahatam ki, bu, Signal-da yaradılmış ilk belə çat deyil. Əgər açıq mənbələrdən yayılan bəzi məlumatlar doğrudursa və Signal-dakı digər çatlardakı söhbətlər Ukraynadakı müharibə ilə bağlı olubsa, ruslar həmin telefonlara daxil ola biliblər. Bu halda onlar bizim nə düşündüyümüzü, atəşkəs barədə necə razılığa gəlməyə ümid etdiyimizi, Ukrayna və ya Rusiya üzərində hansı təzyiqləri tətbiq etməyə hazır olduğumuzu, hansı məsələlərin real, hansılarının isə blef və ya boş söz olduğunu bilirlər. Belə çıxır ki, onlar bu münaqişədə atəşkəsə nail olmaq səylərinə mane olublar”, – Şiff bildirib.

Uzun illər Nümayəndələr Palatasının Kəşfiyyat Komitəsinin sədri olmuş senator Şiff qeyd edib ki, o, bu sızma ilə bağlı kəşfiyyat cəmiyyətinə yaxın şəxslərlə danışıb. Kəşfiyyat dairələrində bir sıra məsələlər üzrə ciddi narahatlıq mövcuddur. Xüsusilə, narahatlıq kadr təmizləmələri ilə bağlıdır. Kəşfiyyat xidmətlərindən Trampın tam tərəfdarı olmayan, yəni MAGA (Make America Great Again) ideologiyasına tam uyğun gəlməyən şəxslərin uzaqlaşdırılmasına çalışırlar. Həmçinin bəzi şəxslər öz istəkləri ilə işdən ayrılırlar.

"Biz kəşfiyyat cəmiyyətinin potensial olaraq zəiflədiyini, peşəkar kadrların azaldığını görürük. Bununla da, kəşfiyyat xidmətlərinin siyasiləşdirilməsinin uzunmüddətli təsirləri ortaya çıxa bilər. Yəqin ki, kəşfiyyat sahəsində işləyənlər üçün heç vaxt indiki qədər çətin dövr olmayıb”, – deyə o əlavə edib.

Volts qalmaqalı və məxfi məlumat sızmaları

Voltsun komandası, təsadüfən bir jurnalisti Yəməndəki hərbi zərbələrlə bağlı qrup çatına daxil etdikdən sonra diqqət mərkəzinə düşüb. Bu, siyasi qalmaqala və onun istefası ilə bağlı çağırışlara səbəb olub.

Daha sonra KİV mənbələrə istinadən məlumat yayıb ki, Mayk Voltsun komandası dünya üzrə böhran vəziyyətlərinə dair müzakirələr aparmaq üçün Signal-da 20-dən çox qrup çat yaradıb. Bu, Tramp administrasiyasının milli təhlükəsizlik məsələlərinin koordinasiyası üçün bu tətbiqdən geniş istifadə etdiyini göstərir.

Dörd mənbənin məlumatına görə, bu çatlarda Ukrayna, Çin, Qəzza, Afrika və Avropaya dair məsələlər müzakirə olunub.

Alpər