Rusiyanın gömrük rüsumları siyahısına salınmaması nəyə hesablanıb? (ŞƏRH)

Qaynarinfo-ya açıqlamasında bunu politoloq Qabil Hüseynli ABŞ Prezidentinin gömrük rüsumları tətbiq etdiyi ölkələr sırasında Ukraynanın adının olmasına rəğmən, Rusiyanın siyahıda yer almamasına münasibət bildirərkən deyib:   

"Trampın bir çox ölkələrdən, o cümlədən Ukraynadan idxal olunan mallara gömrük rüsumu tətbiq etməsi, amma həmin siyahıda Rusiyanın yer almaması başdan-ayağa hoqqabazlıqdır. ABŞ-ın yeni adminstrasiyası beynəlxalq münasibətlərə yeni xaos, nizamsızlıq gətirir. Onlar müstəmləkəçilik dövrünün yeni forması ilə dünya xalqlarına əzab verməyi qarşılarına məqsəd qoyublar”. 

 

Politoloq qeyd edir ki, dünya nəhayət Amerikada iş başına dövlətçilik işini bacarmayanların gəldiyini anlayıb başa düşməlidir: 

"Dünya bunlara etiraz etməlidir. Yaxud da Amerika ilə ticarət əlaqələrini birdəfəlik kəsməlidirlər. Trampın tətbiq etdiyi gömrük rüsumları siyahısında Ukraynanın adının yer almasına rəğmən, Rusiyanın siyahıda olmaması aralarında olacaq gələcək maxinasiyalara, gizli sövdələşmələrə indidən əl yeri qoymağa hesablanmış addımdır. ABŞ-la Rusiya arasında sanksiyalar dövründə belə iqtisadi əlaqələr tam kəsilməyib, müəyəyn dərəcədə var. Ukraynada müharibənin bitməsilə isə bu iki ölkə arasında iqtisadi əlaqələr daha da artacaq. Belə olan halda, siyahıda Rusiyanın adının olmaması əslində hoqqabazlıqdır. Tramp bununla bir daha sübut edir ki, vaxtilə sovet agenti olub, onun Rusiyaya sevgisi var”.  

Qeyd edək ki, ABŞ-ın maliyyə naziri Bessent Fox News-a verdiyi müsahibədə bildirib ki, Rusiya bu siyahıya daxil edilməyib, çünki "Birləşmiş Ştatlar Rusiya ilə ticarət aparmır". Onun sözlərinə görə, hazırda Rusiyaya qarşı ABŞ-ın sanksiyaları qüvvədədir.