Çempionlar Liqasının əsas mərhələsinin püşkatma mərasimini böyük zövqlə izlədik. Hiss olunurdu ki, UEFA rəsmiləri püşkatma mərasiminin özünəməxsus və möhtəşəm keçməsi üçün əllərindən gələni ediblər. Düzdür, son yeniliklərdən sonra püşkatma mərasimi bir qədər avtomatlaşıb, ənənəvi "şarçəkmə mərasimi” öz əhəmiyyətini itirib. İndi əsas rolu kompüter tutur. Bu da başadüşüləndir. Çünki komanda sayı artıb, qrup mərhələsi ləğv olunub. Belədə kompüterin köməyi olmadan işin içindən çıxmaq çox çətin olar.

UEFA prezidenti Aleksander Çeferinlə ötənlərin məşhur futbolçusu Zlatan İbrahimoviçin yer aldı videoçarx püşkatmanı izləyənlərin zövqünü oxşadı. Bununla da UEFA Çempionlar Liqasının əsas mərhələsində aparılan islahatların, baş verən dəyişikliklərin zamanın tələbi olmasına işarə vurdu. İnsafən, son dəyişikliklər bizə qarışıq görünsə də, rəqabətin artmasına yardımçı olub. Yeni sistemin sayəsində komandalar son tura qədər mübarizə aparmalı olur, "nəhənglər” vaxtından əvvəl özlərini rahat hiss edə bilmirlər. Eyni zamanda da komanda sayının artırılması bu futbol bayramından nəsibini alanların əhatə dairəsinin genişlənməsinə, elə bizim də daxil olduğumuz bəlli bir qrupun böyük futbol bayramının bir parçası olmasına xidmət edib.

Bu dəfəki püşkatma mərasimini bizim üçün daha təmtəraqlı edən "Qarabağ”ın o mərhələyə yüksəlməsi, qitənin nəhəng klubları ilə eyni sırada dayanması idi. Qardaş Qazaxıstanın çempionu "Kayrat”ın da Liqa mərhələsinə qədər uzun bir yol qət etməsi, "Qarabağ”la birlikdə "nəhənglər” sırasında yer alması bizi sevindirən digər məqam oldu. Azərbaycan futbolunun səviyyəsi bəllidir. Söhbət təkcə milli səviyyəsindən getmir. Xərclənən milyonların qarşılığında heç klub futbolunda da uğur qazana bilmirik. "Qarabağ” bu mənada istisnadır. Digərləri UEFA Konfrans Liqasında belə mərhələ keçməyə, qrup mərhələsinə yüksəlməyə çətinlik çəkir. Bu da ondan irəli gəlir ki, klublarımız özünə düzgün strategiya seçmir, futboldan çox başqa şeylər barədə düşünürlər.

Bəli, yaxşı ki, "Qarabağ” digərlərindən fərqlənir. 7 illik fasilədən sonra yenidən qitənin ən nüfuzlu klub turnirinin əsas mərhələsinə yüksəlməyi bacarmışıq. İmzaların içində imzamımız olması, Çempionlar Liqasının əsas mərhələsindəki püşkatma mərasimində Qarabağ və Azərbaycan adlarının yanaşı çəkilməsi bizi qürurlandırır, fərəh hissi qəlbimizə hakim kəsilir. Püşkatmanın nəticələrindən narazı qalmaq, rəqiblərin adlarından narahat olmaq da lazım deyil. Bundan sonrası bizim üçün əsl futbol bayramıdır. Onu yaşamaq, hiss etmək və zövq almaq lazımdır. Çempionlar Liqasının əsas mərhələsini arzulamırdıqmı? İndi Qurban Qurbanov və onun yetirmələri, eləcə də "Qarabağ”ın öz işini sevən rəhbərliyi bizi bu arzumuza çatdırıb. Daha nədən narazıyıq? Çempionlar Liqasında rəqibimizin "Levski”, "Hayduk” olmayacağı onsuz da bəlli idi. Hazırkı "Qarabağ”ın ən azından "Kopenhagen”, "Ayaks”, "Ayntraxt” kimi rəqiblərlə mübarizə aparmaq gücündə olduğuna heç şübhəm yoxdu. Qarşıda transfer etmək, heyəti daha da gücləndirmək üçün zaman da var. "Qarabağ” rəhbərliyi və Qurban Qurbanov bu zamanı dəyərləndirib, yeni transferi reallaşdıra bilsə, daha yaxşısına da ümid edə bilərik...

...Çempionlar Liqasının püşkatması bitən kimi "CBC Sport” Azərbaycan Premyer Liqasının reklam çarxını izləyicilərə təqdim etdi. Ekranda "Araz Naxçıvan”ın, "İmişli”nin, "Karvan-Yevlax”ın loqoları görünməyə başladı. Necə deyərlər, borclarımız, dərdlərimiz yadımıza düşdü, Azərbaycan futbolunun əsl səviyyəsi gözümüzün önünə gəldi. Bizi o səviyyədən yüksəklərə qaldıran, Azərbaycan imzasını imzalar içində qoyan "Qarabağ”a ürəkdən minnətdarlıq etməyi özümə borc bildim...

Amal Abuşov