Yeni zelandiyalı yazıçı İnqrid Horroks (Ingrid Horrocks) ilk qısa hekayələr toplusu ilə ölkənin ən zəngin ədəbi mükafatını qazanıb. Onun əsəri müxtəlif həyat mərhələlərində olan qadınların hekayələrini əhatə edir.

İlk dəfə bədii ədəbiyyat janrında çıxış edən İnqrid Horroks "All Her Lives” adlı ilk qısa hekayələr toplusu ilə Yeni Zelandiyanın ən nüfuzlu ədəbi mükafatlarından biri olan Ockham Yeni Zelandiya Kitab Mükafatlarında Jann Medlicott Acorn mükafatına layiq görülüb.

Qaynarinfo xəbər verir ki, Vellinqtonda yaşayan şair, esseist və memuar müəllifi olan Horroks 2026-cı il mükafatlandırma mərasimində 65 min Yeni Zelandiya dolları dəyərində olan mükafatı qazanıb. Kitab doqquz qadının həyatının müxtəlif mərhələlərini əhatə edir və nəsillər boyunca siyasət, gender və analıq mövzularını işıqlandırır.

Bu uğur Ockham mükafatının 58 illik tarixində qısa hekayələr toplusunun yalnız beşinci dəfə əsas mükafata layiq görülməsi deməkdir.

Horroks finalda debüt romançı və kulinariya yazıçısı Laura Vinsent (Laura Vincent), rəssam və yazıçı Sem Mahon (Sam Mahon), eləcə də iki dəfə bu mükafatı qazanan müəllif Ketrin Çidgi (Catherine Chidgey) ilə rəqabət aparıb.

"The Guardian” qəzetinə danışan Horroks adının elan olunmasına "şoka düşdüyünü” bildirib və qeyd edib ki, bu mükafat ona daha çox bədii ədəbiyyat yaratmaq üçün əlavə stimul verəcək.

"Ümid edirəm ki, bu, kitabımı daha çox insanın oxumasına səbəb olacaq”, — deyə o bildirib.

Qadınların həyatını uzun illər qeyri-bədii janrda yazdıqdan sonra Horroks qeyd edib ki, bədii ədəbiyyat ona obrazların daxili dünyasına daha dərindən daxil olmaq imkanı verib.

"Bu, mənim üçün yazıçı kimi çox həyəcanverici oldu”, — deyə o əlavə edib.

Hekayələr Birinci Dünya müharibəsinin son dövründə Yeni Zelandiyanın kənd bölgələrindən Berlinin Weiberfastnacht festivalına, 1981-ci ildə Springbok turuna qarşı keçirilən etiraz aksiyalarına qədər müxtəlif dövrləri və məkanları əhatə edir. Əsərdə qadınların təcrübələri siyasi və sosial dəyişikliklərin fonunda təqdim olunur. Hekayələrdə qabaqcıl feminist yazıçı və filosof Meri Vollstonkraft (Mary Wollstonecraft) obrazı da yer alır.

Münsiflər heyətinin üzvü Kreyq Kliff (Craig Cliff) Horroksun kitabını "təmiz, aydın və artıq yüklənmədən uzaq” adlandırıb.

"O, gender və seksualitet mövzusunu çox ustalıqla işləyir və qadınlığın müxtəlif baxışlarını incə şəkildə təqdim edir”, — deyə o bildirib.

Beynəlxalq münsif Lesli Hörtig (Lesley Hurtig) isə kitabı bir oturuşda oxuduğunu deyib.

"Mən qadınların müxtəlif təcrübələrinin bu qədər geniş diapazonda təqdim olunmasını çox bəyəndim. Uşaqlar, sevgililər, analar, rəssamlar kimi fərqli rollardakı qadınlar zaman və sosial-iqtisadi sərhədləri aşaraq universal hekayələr yaradır”, — deyə o qeyd edib.

Çərşənbə axşamı keçirilən mərasimdə debüt müəlliflər də mükafatlandırılıb. Yeni Zelandiyanın keçmiş baş naziri Casinda Ardern (Jacinda Ardern) "A Different Kind of Power” adlı memuarı ilə EH McCormick mükafatını qazanıb.

Hubert Church mükafatı isə müəllif Con Prinsə (John Prince) debüt qısa hekayələr toplusu "Pastoral Care” əsərinə görə təqdim olunub.

Samoa əsilli şair Nafanua Pürsell-Kersel (Nafanua Purcell Kersel) "Qara Şəkər” ("Black Sugar”) adlı debüt əsərinə görə Mary and Peter Biggs poeziya mükafatına layiq görülüb.

Yazıçı Tina Makereti avtobioqrafik esselərdən ibarət ilk qeyri-bədii kitabı "This Compulsion in Us” ilə ümumi qeyri-bədii ədəbiyyat mükafatını qazanıb. Tarixçi Elizabet Koks (Elizabeth Cox) isə "Mr Ward’s Map: Victorian Wellington Street by Street” adlı illüstrasiyalı qeyri-bədii əsərinə görə mükafatlandırılıb.