"Dmitriyev bu təkliflə dünyada belə təəssürat oyadır ki, guya Rusiya hansısa bir güzəştə gedərək, mövqeyini yumşaldır və güzəştli sülh axtarır. Əslində isə belə deyil”.

Qaynarinfo-ya açıqlamasında bunu politoloq Zərdüşt Əlizadə ABŞ-da danışıqlar aparan Rusiya prezidentinin nümayəndəsi Kiril Dmitriyevin Ukraynaya bəzi təhlükəsizlik təminatlarının verilə biləcəyi barədə bəyanatını şərh edərkən deyib:

"Kiril Dmitriyev gözəl anlayır ki, Putinin danışıqları uzatmaq və bu dövrdən istifadə edib hansısa yeni əraziləri tutmaq və gələcək danışıqlarda özləri üçün daha əlverişli mövqe əldə etmək istəyi Trampa aydındır və bu onu əsəbiləşdirir. Çünki düşünürdü ki, asan yolla müharibəni dayandıracaq. Rusiya tərəfi anlayır ki, Trampın hövsələsi darala və o Moskvaya qarşı hansısa təzyiq addımları ata bilər. Bunun qarşısını almaq üçün Dmitriyev Amerikaya gəlib danışıqlar aparır. Bu danışıqlar əsasında da deyib ki, Moskva NATO xaric olmaqla Ukraynaya hansısa bir təhlükəsizlik zəmanəti verə bilər”.

Z. Əlizadə düşünür ki, rus nümayəndəsinin bu açıqlaması tamamilə məntiqsiz, boş sözdür:

"Çünki NATO kifayət qədər təhlükəsizlik təminatı demək deyil. NATO-nun nizamnaməsinin 5-ci bəndində quruma üzv hər hansı ölkəyə hücumun bütün NATO ölkələrinə hücum olduğu qeyd edilsə də, bu hələ digər dövlətlərin prosesə hərbi yolla müdaxilə edəcəkləri anlamına gəlmir. Onlar yığışır, müzakirə edir və özləri üçün hansısa yardım formasını tapırlar. Digər tərəfdən, hazırda NATO dərin böhran içindədir, Amerika ilə Avropa ölkələri arasında dərin uçurum yaranıb. Belədə NATO artıq kifayət qədər səmərəli özünümüdafiə təşkilatı sayıla bilməz. Yəni öhdəlik götürməklə müdafiə etmək arasında böyük fərqlər var”.

Politoloqun fikrincə, Ukrayna üçün ən böyük və ciddi təminat bu ölkə ordusunun gücləndirilməsindən keçir:

"Ukrayanın silahı və pulu olmalıdır ki, bu ordunu saxlasın. Lakin Qərb bunu təmin etmir. Əvəzində nisyə söhbətlər edir. Rusiya da bunu anlayır və ondan sui-istifadə edərək, Ukraynanı işğal etməkdə davam edir. Yəni Kiril Dmitriyevin təklifi Ukrayna üçün heç nə demək deyil. Amma bununla dünyada belə təəssürat oyadır ki, guya Rusiya hansısa bir güzəştə gedərək, mövqeyini yumşaldır və güzəştli sülh axtarır. Gerçəkdə belə deyil. Rusiya sərt işğalçı mövqeyində qalmaqda davam edir”.

Qeyd edək ki, Rusiya prezidentinin nümayəndəsi Kiril Dmitriyev Ağ Evdə danışıqlardan sonra Ukraynaya təhlükəsizlik zəmanəti verə biləcəklərini bəyan edib.

FOX News-a açıqlamasında o bildirib ki, Ukrayna üçün bu və ya digər formada bəzi təhlükəsizlik təminatları məqbul ola bilər. Lakin bu zaman o, hansı təhlükəsizlik təminatlarını nəzərdə tutduğunu açıqlamayıb. Sadəcə bildirib ki, Ukraynanın NATO-ya qəbul edilməsi qəti olaraq yolverilməzdir.

Rüfət Sultan