Bakı Platforması - bütün infrastrukturlar üzrə analoqu olmayan müstəvi... (RƏY)

Qaynarinfo-ya açıqlamasında bunu neft-qaz məsələləri üzrə ekspert İlham Şaban Bakıda keçirilən Cənub Qaz Dəhlizi Məşvərət Şurası çərçivəsində nazirlərin 11-ci və Yaşıl Enerji Məşvərət Şurası çərçivəsində nazirlərin 3-cü iclasının əhəmiyyətini şərh edərkən deyib: 

"Azərbaycan 2015-ci ildən başlayaraq artıq 11-ci dəfədir ki, bu tədbiri keçirir. Tədbirin məqsədi Xəzər regionu ilə Avropa bazarları arasında stabil, təhlükəsiz, artan həcmlərlə qaz təminatı ilə istehlakçıları təmin etməkdir. Məşvət Şurası da keçmiş dövrə nəzər salmaq, onları qiymətləndirmək, qarşıda ola biləcək baryerləri daha tez aşmaq üçün həll variantlarını ortaya qoymaq və onları müvafiq qurumlara təqdim etmək məqsədilə toplanır. Bu baxımdan Bakı Platforması dünyanın müxtəlif ölkələri arasında indiyə kimi olan bütün infrastrukturlar üzrə analoqu olmayan bir müstəvidir. Hansındaki hökumətlər, şirkətlər və maliyyə qurumları mütəmadi olaraq yığışıb öz fikirlərini səsləndirirlər”. 

 

Ekspert qeyd edir ki, qarşıdakı 5 ildə Azərbaycan qazının Avropaya ixrac həcmlərinin artırılması nəzərdə tutulur:

"Çünki Azərbaycanın kifayət qədər qaz ehtiyatları var, yeni yataqlar istismara verilir və istehlakçılarla onlar arasında qarşılıqlı maraqları qorunmaq şərtilə məsələlərin həllinə nail olunur. Bakıda Gülüstan sarayında keçirilən tədbir də məhz ona hesablanıb”.

 

Azərbaycanın qaz təchizatı coğrafiyasının genişlənəcəyi təqdirdə daha hansı ölkələrin bundan yararlanacağına gəldikdə isə, həmsöhbətimiz bildirir ki, hansı ölkə ilə qiymətlərin razılaşdırılması məqbul olacaqsa, o ölkələr də mavi yanacağımızı alacaq:

"Çünki Azərbaycan humanitar təşkilat deyil. Qarşımızda belə bir missiya da yoxdur”.  

Qeyd edək ki, Bakıda Cənub Qaz Dəhlizi Məşvərət Şurası çərçivəsində nazirlərin 11-ci iclası və Yaşıl Enerji Məşvərət Şurası çərçivəsində nazirlərin 3-cü iclası keçirilir. 

Azərbaycan Prezidenti İlham Əliyev iclasda bildirib ki, indi Cənub Qaz Dəhlizi tam gücü ilə işləyir. Cənubi Qafqaz Boru Kəməri, TANAP, TAP həmin bu dəhlizin 3 ayrılmaz hissəsidir:

"Onlar tam iş gücündə işləyir və biz onları genişləndirməliyik. Bu gün Azərbaycan təbii qazı 12 ölkəyə çatdırır. Onlardan 10-u Avropa ölkəsidir, 8-i isə Avropa İttifaqının üzvləridir. Bizim qaz təchizatımızın Avropadakı coğrafiyası birmənalı olaraq genişlənəcək, çünki biz artıq qazpaylama şəbəkəsinin yaradılmasında bəzi Avropa ölkələrində işləyirik. Onların bəzilərində var, digərləri isə genişləndirilməlidir. Azərbaycan bunu etməyi planlaşdırır. Beləliklə, bizim qaz təchizatının coğrafiyası birmənalı olaraq genişlənəcək”.