Qaynarinfo xəvər verir ki, Argentina prezidenti Xavyer Miley ölkədə nasistlərə aid olan bütün məxfi sənədlərin ictimaiyyətə açılacağını bəyan edib. İddialara görə, Hitler 1945-ci ildə intihar etməyib, əksinə, Cənubi Amerikaya qaçaraq uzun illər gizli şəkildə yaşayıb.

MKİ sənədləri: Hitler 10 il sonra axtarılıb

ABŞ Mərkəzi Kəşfiyyat İdarəsi (MKİ) tərəfindən məxfiliyi ləğv olunan sənədlər, nasist lider Adolf Hitler haqqında 1955-ci ilə qədər davam edən genişmiqyaslı axtarış əməliyyatlarının həyata keçirildiyini üzə çıxarıb. MKİ arxivində yer alan çoxsaylı hesabatlara əsasən, Cənubi Amerikada fəaliyyət göstərən agentlər Hitlerin hələ də sağ olduğuna və adını dəyişərək gizləndiyinə inanıb.

Kolumbiyada fəaliyyət göstərən bir agent "Adolf Şrittelmayor" adı ilə tanınan və Hitlerə çox bənzəyən bir şəxsin fotosunun əldə edildiyini bildirib.

Hitler Argentinada gizlənə bilərdi

1945-ci ilin aprelində müttəfiq qüvvələrin Hitlerin Berlində yerləşən bunkerdə özünə qəsd etdiyini göstərən yanmış bir cəsəd tapmasına baxmayaraq, 2020-ci ildə məxfiliyi ləğv olunan sənədlər ABŞ kəşfiyyat orqanlarının II Dünya müharibəsindən dərhal sonra Hitlerin Argentinada gizləndiyi yeri müəyyən etməyə çalışdığını ortaya qoyur.

Sonrakı on il ərzində bu axtarışlar davam edib və MKİ 1955-ci ildə Hitlerin gizli qaçışı haqqında məlumata sahib olduğu ehtimal edilən mənbələrlə əlaqə saxlayıb. Bu mənbələrdən biri sənədlərdə "CIMELODY-3" kod adı ilə qeyd olunur.

Nasist zabitdən iddialar: "Hitlerlə müntəzəm görüşürdüm"

Venesuelada yaşamış sabiq SS zabiti Filip Sitroen ilə əlaqə saxlayan bu mənbə onun Hitlerlə müntəzəm görüşdüyünü iddia etdiyini bildirib.

Sitroen müharibənin üzərindən 10 il keçdiyini əsas gətirərək Hitlerin artıq hüquqi cəhətdən mühakimə oluna bilməyəcəyini irəli sürüb.

Argentina gizli sənədləri açdı

MKİ sənədlərinin izi 1955-ci ilin noyabrında itib, lakin mart ayında Argentina prezidentinin verdiyi qərar bu araşdırmaları yenidən gündəmə gətirib. Prezident Xavyer Miley nasistlərə aid olan bütün məxfi sənədlərin ictimaiyyətə təqdim olunmasını əmr edib.

Argentina II Dünya müharibəsindən sonra mühakimədən yayınan keçmiş nasistlər üçün ən məşhur sığınacaq ölkələrdən biri olub. Yeni açılan sənədlərin MKİ-nin illərlə davam edən və nəticəsiz qalan araşdırmalarının cavablarını üzə çıxara biləcəyi ehtimal edilir.

"Siçan yolları" və ABŞ-ın rolu

Yeni sənədlərin nasistlərin II Dünya müharibəsindən sonra Cənubi Amerikaya qaçmaq üçün istifadə etdiyi gizli "siçan yolları” (ratlines) haqqında ətraflı məlumatlar təqdim edəcəyi gözlənilir.

ABŞ-ın müharibədən sonrakı dövrdə həyata keçirdiyi "Kağız qısqac əməliyyatı” çərçivəsində 1600-dən çox alman alimini ölkəyə gətirdiyi və onların bir qisminin nasist rejimi ilə əlaqəli olduğu artıq məlumdur.

Argentinanın bu məxfi sənədləri açıqlamaq qərarı ABŞ-ın da Cənubi Amerikadakı nasistlərlə olan əlaqələri barədə yeni məlumatların ortaya çıxmasına səbəb ola bilər.

Aydın