Səyahətlər yeni ölkələri və mədəniyyətləri kəşf etmək üçün maraqlı fürsət yaratsa da, bunun mənfi tərəfləri də var. Yerli mühiti və ya qanunları bilməmək turistləri saxtakarların hədəfinə çevirə bilər.

Qaynarinfo xəbər verir ki, "The Daily Mail”in məlumatına görə, turistlərə qarşı saxtakarlıq halları son 18 ayda 900 faiz artaraq rekord səviyyəyə çatıb. Cinayətkarlar daha da təkmilləşmiş üsullardan istifadə edərək səyahətçilərin pullarını, sənədlərini və ya maliyyə resurslarına çıxışını itirməsinə səbəb olurlar.

Media orqanı 2026-cı ildə turistlər üçün ən çox rast gəlinə biləcək saxtakarlıq növlərini açıqlayıb.

Mehriban cibgirlər

Cibgirlik dünya üzrə səyahətlər zamanı ən geniş yayılmış saxtakarlıq formalarından biri olaraq qalır. Xüsusilə Barselona və Roma kimi sıx turist məkanlarında risk daha yüksəkdir.

Cinayətkarlar adətən qruplar halında hərəkət edir və diqqəti yayındırmaq üçün müxtəlif üsullardan istifadə edirlər. Bu zaman onların tərəfdaşları pulqabı və ya telefonu oğurlayır. Bəzən turistin üzərinə nəsə tökmək və ya əşyalar atmaq kimi üsullardan da istifadə olunur.

"Sadə oğurluqdan fərqli olaraq, cinayətkarlar özlərini mehriban yerli sakin, qeyri-rəsmi bələdçi və ya kömək təklif edən şəxs kimi təqdim edərək etibar qazanmağa çalışırlar”, deyə "Confused.com” platformasının səyahət eksperti Tom Voqan bildirib.

Mütəxəssislər sıxlıq yerlərdə diqqətli olmağı, çantanı ön tərəfdə saxlamağı və gözlənilməz fiziki təmaslara qarşı ehtiyatlı davranmağı tövsiyə edir.

Sifarişlərdə qiymətlərin şişirdilməsi

Səyahətçilərin təxminən 70 faizi xaricdə hələ də nağd puldan istifadə edir, lakin kartla ödəniş bir çox turist üçün üstünlük təşkil edir. Bu, xərcləri izləməyə və bəzən daha sərfəli valyuta məzənnəsi ilə qənaət etməyə imkan verir.

Lakin bu üsul da risk yarada bilər. Bəzi hallarda müştərilərdən göstərilən qiymətdən daha yüksək məbləğ tutulur. Hətta bəzi saxtakarlar bunun üçün saxta ödəniş terminallarından istifadə edirlər.

Ekspertlər açıq məkanlarda yerləşən ödəniş terminallarından istifadə etməməyi və əməliyyatdan əvvəl ekrandakı məbləği diqqətlə yoxlamağı tövsiyə edir.

"Quş nəcisi” tələsi

"Quş nəcisi” saxtakarlığı diqqətin yayındırılmasına əsaslanan klassik üsuldur və London kimi şəhərlərdə yenidən müşahidə olunur. Bu üsulda turistin üzərinə boya və ya qida atılaraq guya quş nəcisi təəssüratı yaradılır. Daha sonra "kömək etmək istəyən” şəxs yaxınlaşır.

Turist ləkəni təmizləməyə fokuslandığı anda onun əşyaları oğurlanır. Bu cür hadisələr Avropanın müxtəlif şəhərlərində qeydə alınıb.

Şəkil çəkdirmə bəhanəsi

Misir və Mərakeş kimi ölkələrdə, xüsusilə Giza piramidaları və ya Marakeşin Cəməl əl-Fna meydanı kimi yerlərdə yerli sakinlər turistlərə şəkil çəkdirməyi təklif edə bilirlər.

Lakin bu jest tez bir zamanda pul tələb etməyə və ya "çay pulu” istəməyə çevrilir və bəzən aqressiv xarakter alır.

Taksidə saxtakarlıq

Taksi və Uber kimi xidmətlərdə saxtakarlıq halları geniş yayılıb. Sürücülər sayğacı işə salmaqdan imtina edə, daha uzun marşrut seçə və ya tətbiqdə saxta sürücülük profillərindən istifadə edə bilirlər.

Bəzi hallarda isə sifarişlər son anda ləğv edilir və sərnişin əlavə ödəniş etmək məcburiyyətində qalır.

"Pulsuz” qolbaqlar

Paris və Roma kimi şəhərlərdə turistlərə "pulsuz” qolbaq təklif edilməsi yayılmış tələ üsuludur. Qolbaq bağlandıqdan sonra isə pul tələb olunur. Bəzi hallarda bu, aqressiv şəkildə həyata keçirilir.

Bir turistin sözlərinə görə, Parisdə bir neçə nəfər onu mühasirəyə alaraq qolbaq üçün pul tələb edib.

Yaşayış yeri saxtakarlığı

Süni intellektin inkişafı saxta bron saytlarını və rəy sistemlərini daha inandırıcı edib. Turistlər bəzən mövcud olmayan evlər üçün depozit ödəyir və ya gəldikdə rezervasiyanın etibarsız olduğunu öyrənirlər.

Bu isə həm maliyyə itkilərinə, həm də son anda alternativ yaşayış yeri axtarışına səbəb olur.

Saxta bələdçilər

Misir və İordaniya kimi ölkələrdə turistlərə özlərini rəsmi bələdçi kimi təqdim edən şəxslər rast gəlinir. Onlar yanlış məlumat verə, turistləri bahalı mağazalara yönləndirə və yüksək ödəniş tələb edə bilərlər.

Saxta biletlər

İtaliya və Fransa kimi ölkələrdə Kolizey, Eyfel qülləsi və Vatikan kimi məkanlar üçün saxta biletlər geniş yayılıb. Turistlər çox vaxt bunu yalnız girişdə anlayırlar.

2026-cı ilin fevralında Parisdə Luvr muzeyi ilə bağlı saxta bilet sxeminə görə doqquz nəfər saxlanılıb. Son 10 ildə bu cür fırıldaqlarla milyonlarla dollar vəsait itirilib.

Valyuta dəyişimi saxtakarlığı

Nağd ödəniş zamanı saxtakarlar pulları gizlicə dəyişə və ya turistin yanlış məbləğ verdiyini iddia edə bilirlər. Bu üsul xüsusilə bazarlarda və taksilərdə geniş yayılıb.

Ekspertlərin sözlərinə görə, valyuta məzənnələri və xarici pul vahidləri ilə bağlı qarışıqlıq turistlərin vəziyyəti tez dərk etməsini çətinləşdirir.

Aydın