Məlumata görə, sözügedən qanun 100 ildən çox əvvəl - 1907-ci ildə qəbul edilib. O dövrdən etibarən xəyanət edən şəxslər üç ay müddətinə həbs oluna bilərdi. Boşanmaq istəyən cütlüklər isə yalnız xəyanəti sübut etməklə qanuni yolla ayrılmaq hüququ qazanırdılar.

Ştatın qubernatoru Keti Hoçul qeyd edib ki, qanun "mənasız və köhnəlmişdir", çünki insanlar arasında münasibətlər mürəkkəb ola bilər və bu kimi münaqişələr cinayət sistemi ilə deyil, şəxslər arasında həll olunmalıdır.

"40 il ərzində həyat yoldaşımla xoşbəxt bir evlilik həyatı yaşamaq mənə nəsib olub - bu da xəyanəti dekriminallaşdıran qanunu imzalamağımı bir qədər ironik edir. Amma insanların münasibətlərinin çox vaxt mürəkkəb olduğunu bilirəm. Bu məsələlər açıq-aydın cinayət sistemi ilə deyil, insanların özləri tərəfindən həll edilməlidir. Gəlin bu mənasız və köhnəlmiş qanunu bir daha müzakirə etməmək üçün tarixdən silək", deyə Hoçul bildirib.

Nyu York ştatında xəyanət, "şəxsin öz həyat yoldaşı sağ olduğu halda, başqa bir şəxslə cinsi münasibətə girməsi" olaraq müəyyən edilirdi. Qanun qüvvəyə mindikdən bir neçə həftə sonra ilk dəfə 25 yaşlı qadın və evli bir kişi bu qanunla həbs edilmişdi.

Qanunun ləğvi təşəbbüsünü irəli sürən Nyu York Assambleyasının üzvü Çarlz Levin bildirib ki, 1970-ci illərdən bəri qanun əsasında təxminən 12 nəfərə ittiham irəli sürülüb və yalnız beş halda məhkumluq qeydə alınıb.

"Qanunlar cəmiyyətimizi qorumaq və antisosial davranışlara maneə yaratmaq üçün nəzərdə tutulur. Lakin Nyu Yorkun xəyanət qanunu bu məqsədlərin heç birinə xidmət etmirdi", deyə Levin bildirib.

Qanunun sonuncu dəfə 2010-cu ildə tətbiq olunduğu bildirilir. Həmin vaxt bir qadın ictimai parkda cinsi əlaqəyə girdiyi üçün ittiham olunmuşdu. Lakin məhkəmə razılaşması əsasında bu ittiham ləğv edilmişdi.

Qanunun ləğvi məsələsi 1960-cı illərdə də gündəmə gəlmişdi. O vaxt cəza məcəlləsini nəzərdən keçirən bir komissiya qanunun icrasının demək olar ki, qeyri-mümkün olduğunu bildirmişdi. Lakin qanunvericilərdən biri bu müddəanın ləğv edilməsinin ştatın xəyanəti dəstəkləməsi kimi qəbul ediləcəyini iddia edərək dəyişikliklərə mane olmuşdu.

Qeyd edək ki, bu qanun evli şəxsin nikahdan kənar bir münasibətə girməsi və ya həyat yoldaşına sədaqətsizlik etməsini ehtiva edir. Bu, ənənəvi olaraq ailə qanunlarında və cəmiyyətdə mənəvi dəyərlərlə bağlı bir pozuntu kimi qəbul edilib.

Bir çox ölkə və ştatlarda, o cümlədən ABŞ-ın bəzi bölgələrində, xəyanət əvvəllər cinayət məsuliyyəti yaradan bir hərəkət hesab olunurdu. Bu, həm də boşanma prosesində bir tərəfin digərini məhkəmə qarşısında günahlandırması üçün əsas olaraq istifadə edilirdi.

Nyu Yorkda isə bu cür qanun artıq köhnəlmiş hesab edilir və münasibətlərdə yaranan bu cür problemlərin cinayət hüququnun predmetindən çıxarılmasına qərar verilib. Artıq xəyanət edən tərəf üçün cinayət cəzası (həbs) nəzərdə tutulmur. Bu dəyişikliyə görə, şəxsi münasibətlərdəki məsələlər insanların özləri tərəfindən və ya ailə məhkəmələri vasitəsilə həll edilməlidir.

Aydın