"Rəsmi Tiflis bu kimi açıqlamalarla Trampın 90 gün müddətində digər ölkələrə bütün yardım proqramlarını dayandırmasından bəhanə kimi istifadə edərək, ölkədəki gərginliyi səngitməyə çalışır”.

Bunu Qaynarinfo-ya açıqlamasında siyasi şərhçi Elçin Şıxlı deyib:

"ABŞ Prezidenti Trampın daha heç bir xarici ölkəyə pul verməyəcəyini bəyan etməsilə Gürcüstan rəsmiləri də keçən il qəbul etdikləri "Xarici təsirin şəffaflığı haqqında” qanunun artıq mənasını itirdiyi qənaətinə gəliblər. Digər versiyaya görə, xarici agent məsələsinə gələndə bu müstəvidə tək Amerika aid deyil, burada Avropa Birliyi ölkələri də yer alır. Aydındır ki, Gürcüstan hakmiyyəti Trampın 90 gün müddətində digər ölkələrə bütün yardım proqramlarının dayandırılması haqqında qərarından ruhlanaraq xarici agent haqqında məsələdə belə bir fikrə gəliblər. Digər tərəfdən, rəsmi Tiflis ola bilsin ki, Trampın həmin bəyanatından bəhanə kimi istifadə edərək, ölkədəki gərginliyi səngitmək üçün sözügedən açıqlamanı gündəmə gətiriblər”.

Həmsöhbətimiz qeyd edir ki, Şengen zonasına vizasız gediş-gəlişin ləğvi bütün hallarda Gürcüstanda narazı kütlənin sayının artmasına gətirib çıxaracaq:

"Gürcüstanda əsas məsələ ölkə vətəndaşlarının vizasız Şengen ölkələrinə getmək imkanının bağlanmasıdır. Bu baş verərsə, insanlar etirazlarını davam etdirəcək. Məsələ ondadır ki, çoxsaylı Gürcüstan əhalisi vizasız Şengen ölkələrinə səfərlər edərək, bu vasitə ilə dolanırdı. Amma siyasi partiyalar, ictimai fəallara isə xarici agentlər haqqında qanun təsir edir. Vizasız gediş- gəliş isə bütün gürcü əhalisinə şamil olunur. Onun ləğvi bütün Gürcüstan vətəndaşlarının narazılığına səbəb olacaq. Nəticədə etirazçıların sayı da bu minvalla artacaq”.

Qeyd edək ki, Gürcüstanın hakim "Gürcü Arzusu” partiyasının parlament çoxluğunun lideri Mamuka Mdinaradze brifinqdə Tramp administrasiyasının qərarından sonra Gürcüstanda "Xarici təsirin şəffaflığı haqqında” qanunun öz aktuallığını itirə biləcəyinə işarə vurub. Onun sözlərinə görə, artıq bu qanuna Gürcüstanda ehtiyac olmaya bilər. "Xarici təsirin şəffaflığı haqqında” qanun mütləq idi. Trampın ilk qərarlarından biri bunu təsdiqlədi”, - M.Mdinaradze qeyd edib.

Xatırladaq ki, ABŞ prezidenti Donald Trampın imzaladığı ilk fərmanlardan biri digər ölkələrə bütün yardım proqramlarının 90 gün müddətinə dayandırılması haqqında olub. Gürcüstanda etirazlara səbəb olan, "Xarici təsirin şəffaflığı haqqında” qanun 2024-cü ilin avqustun 1-də qüvvəyə minib. Qanunla maliyyələşmənin 20 faizini xaricdən alan qeyri-hökumət təşkilatlarının qeydiyyatı tələb olunur.

Rüfət Sultan