Əhalinin xarici valyutada olan əmanətləri artır: Manat ucuzlaşacaq?

Azərbaycan manatının dollara çevrilib saxlanılmasının səbəbi nədir?

İqtisadçı ekspert Akif Nəsirli Qaynarinfo-ya açıqlamasında bildirib ki, bir il ərzində Azərbaycanda dollara tələbat iki dəfədən çox artıb:

"Hətta ötən ilin fevral ayında bir milyard dollara yaxın vəsait hərraca çıxarılıb və satılıb. Onun ardınca isə bu satışların həcmi 500-700 milyon arasında tərəddüd etdi. 2015-ci il devalvasiyası dövründə eyni tendensiya müşahidə edilirdi, dollara tələbat artmışdı, hərracların sayı və həcmi böyüyürdü. Nəticədə sonda Mərkəzi Bank devalvasiyaya getdi, manatın dollar qarşısında ucuzlaşması müşahidə olundu. 2024-cü il ərzində həmin hərracların sayının və dollar satışının həcminin artması insanlarda təşviş yaratdı, hər kəsə ehtiyatlı davranmaq siqnalı verdi. Sözsüz ki, hamı peşəkar iqtisadçı deyil. Əslində 2015-ci ildəki proseslərlə 2024-cü ildəki proseslər arasında xeyli fərqlər var idi. Fərqlər ondan ibarət idi ki, dollar satışının həcmi heç vaxt bir milyardı keçmədi, maksimum 900 milyon oldu. Ondan sonra isə tendensiya bir qədər aşağı düşdü. Digər tərəfdən dollara tələbatın artması ilə yanaşı Mərkəzi Bankın valyuita ehtiyatları artdı".

 

Akif Nəsirlinin sözlərinə görə, 2015-ci ildə dollara tələbat həddən artıq dərəcədə artdı:

"Hətta bir ayda 2-3 milyard dollar hərraca çıxarılıb satılırdı. Digər tərəfdən də Mərkəzi Bankın valyuta ehtiyatları azalırdı. Ona görə də hökumətin manatı sabit saxlamaq imkanları var idi. Bu imkandan istifadə edib il ərzində dolları sabit saxladılar. Bu sabitlik indi də davam edir. Mərkəzi Bankın valyuta ehtiyatları ərimir, az da olsa çoxalır. Artıq bu ildən əminlik yaradır ki, hökumət manatın məzənnəsi ilə bağlı siyasətini davam etdirəcək. Mənə elə gəlir, bu il pulu olan fiziki və hüquqi şəxslərdə narahatlıq olmayacaq ki, manatın məzənnəsi dəyişə bilər".

Akif Nəsirli manatın ucuzlaşma ehtimalının olmadığını vurğulayıb:

"Xarici valyutaya maraq da ona uyğun olaraq sabitləşəcək. Ötən il bir qədər xarici valyutaya maraq artmışdı. Bu il həmin maraq sabitləşəcək".