Avropada karyera qurmaq istəyən milyonlarla insan üçün 2026-cı ildə istiqamət dəyişir. Əvvəllər əsas seçimlər Almaniya və Niderland idisə, indi yeni cazibə mərkəzi İrlandiyadır. "Avropanın Silikon vadisi” kimi tanınan bu ada dövləti kadr çatışmazlığını aradan qaldırmaq üçün əmək bazarını sürətlə genişləndirir.

Qaynarinfo "Observator" portalına istinadən xəbər verir ki, İrlandiya hökuməti artıq işə qəbul platformalarında xarici vətəndaşlar üçün vakansiyalar elan edib. Bu proqram çərçivəsində təxminən 55 000 nəfər həm iş icazəsi, həm də yaşayış icazəsi əldə edə bilər. Müəyyən sahələrdə maaşlar aylıq 7000 avroya qədər çata bilər.

İrlandiyada "Google", "Apple", "Meta" və "Microsoft" kimi texnologiya nəhənglərinin Avropa qərargahları yerləşir. İqtisadiyyatın sürətli inkişafı əmək bazarında gözlənilməz boşluq yaradıb və bu, təkcə IT sahəsində deyil, həm də tikinti, səhiyyə, logistika və xidmət sektorunda ciddi kadr çatışmazlığına səbəb olub.

Bu problemi həll etmək üçün İrlandiya hökuməti kritik əhəmiyyətli peşələrin siyahısını genişləndirib və xüsusilə Avropa İttifaqı xaricindən olan ixtisaslı işçilər üçün viza prosedurlarını sadələşdirib, deyə "Sözcü" nəşri bildirir.

Təklif olunan maaşlar

Texnologiya sektorunda proqram mühəndisləri və kibertəhlükəsizlik mütəxəssisləri üçün başlanğıc maaşlar aylıq 6000–7500 avro arasında dəyişir.

Səhiyyə sahəsində tibb bacıları və ixtisaslaşmış həkimlər ən çox tələb olunan peşələr sırasındadır. Onların aylıq gəliri 7000 avronu keçə bilər və əlavə bonuslar da nəzərdə tutulur.

Tikinti və mühəndislik sahələrində də maaşlar yüksəkdir: sahə rəhbərləri və elektrik mühəndisləri adətən aylıq 5000–6500 avro qazanır. Qaynaqçılar, santexniklər və yük maşını sürücüləri isə ayda 3500–4500 avro əməkhaqqı əldə edə bilər.

Müraciət şərtləri

İşə qəbul üçün ən vacib addım İrlandiyada fəaliyyət göstərən şirkətdən rəsmi iş təklifi almaqdır. Bu təklif əldə edildikdən sonra işə düzəlmə və iş icazəsi prosesi xeyli sürətlənir və sadələşir.

İngilis dili bilikləri olduqca vacibdir, hətta rəsmi dil imtahanı hər zaman tələb olunmasa belə. Namizədlər müsahibələri ingilis dilində keçə bilməlidir. Bundan əlavə, beynəlxalq səviyyədə tanınan peşə ixtisası və ya diplom seçim prosesində üstünlük yaradır.

Müraciət üçün tələb olunan sənədlərə etibarlı xarici pasport, təsdiqlənmiş əmək müqaviləsi, CV, diplom və ya peşə sertifikatları, həmçinin məhkumluğun olmaması haqqında arayış daxildir.

Dərhal iş təklifi ala bilməyənlər üçün alternativ variant da mövcuddur: "Stamp 2" vizası çərçivəsində Work and Study proqramı ilə dil məktəbinə qəbul mümkündür. Bu proqram təxminən 25 həftə davam edir və bu müddətdə tələbələr həftədə 20 saata qədər qanuni işləyə bilər.

Eyni zamanda onlar daimi iş axtararaq sonradan "Stamp 1" və ya "Stamp 4" tipli iş icazəsinə keçid edə bilərlər.

Aydın