Ekspertlər Avropa ölkələrindəki miqrasiya böhranını qiymətləndirib. Miqrasiya böhranının Avropada radikal sağın yüksəlişini davam etdirdiyini bildirən mütəxəssislər, bu vəziyyətin populist partiyaların mövqelərini gücləndirdiyini vurğulayıb.

Qaynarinfo xəbər verir ki, Birləşmiş Millətlər Təşkilatının (BMT) elan etdiyi "18 dekabr Beynəlxalq Miqrantlar Günü" münasibətilə Avropadakı miqrasiya böhranı müzakirə edilib.

Mütəxəssislər miqrasiya böhranının hələ də həll olunmadığını və bunun nəticəsində radikal sağın yüksəlişinin davam etdiyini bildirərək, mərkəz partiyalarının miqrasiya siyasətlərini izah etməkdə uğursuz olduğunu və bu uğursuzluğun populist sağ partiyaların əlini gücləndirdiyini qeyd ediblər.

"Miqrant qorxusundan istifadə edirlər"

"Avropanın dostları" (Friends of Europe) adlı düşüncə mərkəzinin qurucusu Kaylz Merrit miqrasiyanın Avropa siyasətini yenidən formalaşdırdığını dryib: "Brexit səsverməsi ilə Britaniyanın Avropa İttifaqından (Aİ) çıxışı əsasən miqrantlara qarşı duyğulardan qaynaqlandı. Eyni təsiri Fransa, Almaniya, İtaliya və daha az miqyasda İspaniya və Niderlandda da görürük".

Merrit miqrantların Aİ-nin işçi qüvvəsinə töhfəsindən bəhs edib: "Populist partiyalar insanların miqrant qorxusundan istifadə edir və vəziyyəti daha da pisləşdirirlər. Problem müxtəlif miqrasiya növləri arasında fərq qoyulmamasıdır. Avropa qocalır və yaxın zamanda əhalisi azalacaq. İşçi qüvvəsinə ehtiyac var. Azalan doğum səviyyəsini əksinə çevirmək üçün gənc ailələrə ehtiyac var. Çünki daha çox insan olmadan iqtisadi inkişafı davam etdirəcək vergi gəlirləri və işçi qüvvəsi olmayacaq".

"Uzunmüddətli perspektivdə həyat səviyyəsini yüksəldəcək"

Populist partiyaların miqrasiya əleyhinə mövqelərini seçki vasitəsi kimi istifadə etməsinə Merrit deyib: "Problem onların bu vəziyyətdən istifadə etməsi deyil, populyar olmalarıdır. İnsanlar miqrasiyanın həyat səviyyəsini aşağı saldığına inanır. Halbuki, miqrasiya uzunmüddətli perspektivdə həyat standartlarını yüksəldəcək bir təminat şəbəkəsidir".

"Avropada miqrasiyaya ən çox qarşı çıxan bölgələr miqrantların olmadığı kənd yerləridir. İnsanlar miqrasiya haqqında nə qədər az şey bilirlərsə, bir o qədər şübhəçi olur və miqrantları rədd edirlər. Mərkəz partiyalar miqrasiya əleyhinə ritorikayla mübarizə aparmaqda siyasi cəsarətdən məhrumdurlar", deyə Merrit əlavə edib.

Niderland nümunəsi

Merrit Niderlanddakı son seçkilərdə radikal sağçı Hert Vildersin partiyasının birinci olmasını şərh edib: "Vilders baş nazir deyil, lakin fikirləri ilə siyasi gündəmi təsir edir. Miqrantları deportasiya etmək üçün fövqəladə vəziyyət qanunu buna misaldır".

"Tək başına izah etmək mümkün deyil"

İnnsbruk Universitetinin iqtisadiyyat professoru Andreas Ştaynmayer 2015-ci ildə baş verən qaçqın axınının Avropada radikal sağın yüksəlişinə təsirlərinə diqqət çəkib: "Mülkiyyətin yerləşdirildiyi və yerli əhali ilə təmasın təşviq olunduğu bölgələrdə radikal sağ partiyalara dəstək azaldı. Lakin qaçqınların sadəcə tranzit etdiyi bölgələrdə radikal sağa dəstək artdı".

Ştaynmayer əlavə edib ki, mərkəz partiyalar insan hüquqlarını qoruyarkən miqrasiyanı idarə edəcək siyasətlər hazırlamadığı müddətcə radikal sağın yüksəlişi davam edə bilər.

Aydın