Süni intellekt (Al) sürətlə inkişaf edir və iş həyatımızda daha geniş yer tutur. O, faydalı alət olsa da, hələ də etibar qurmaq, gərginliyi idarə etmək və insanlara dəyərli olduqlarını hiss etdirmək qabiliyyətinə malik deyil.

Qaynarinfo xəbər verir ki, karyerası ərzində Kerol Parker Uolş professor, əmək mübahisələri üzrə vəkil, kadrlar üzrə rəhbər, məşqçi və baş direktor kimi çalışıb. O qeyd edir ki, süni intellektin üstünlük təşkil etdiyi müasir dünyada emosional intellekt xüsusilə iş mühitində nadir bir supergücə çevrilir. Mütəxəssis CNBC üçün yazdığı məqalədə bu bacarığa sahib olduğunuzu göstərən dörd əsas əlaməti təqdim edib.

İnsanlara özlərini təhlükəsiz hiss etdirməyiniz

Yüksək emosional intellektə malik liderlər iş yerində psixoloji təhlükəsizlik mühiti yaradır. Komanda üzvləri problemlər böyümədən əvvəl narahatlıqlarını açıq şəkildə ifadə edə biləcəklərini bilirlər. Əgər əməkdaşlar yalnız vəziyyət nəzarətdən çıxdıqdan sonra danışırsa, bu, mənfi siqnaldır.

Əksinə, əgər onlar erkən mərhələdə həqiqəti rahatlıqla deyir, sizin yanınızda özlərini senzura etmirlərsə, bu, emosional intellektin aydın göstəricisidir.

Reaksiya verməzdən əvvəl fasilə etməyiniz

Emosional cəhətdən inkişaf etmiş insanlar stressin davranışlarına nəzarət etməsinə imkan vermir və vəziyyəti tam anlamadan tələsik qərar vermirlər. Bunun üçün "peşəkar fasilə” üsulundan istifadə etmək tövsiyə olunur: beş saniyə gözləyin və emosiyalar yerinə məntiqə üstünlük verin.

Sonrakı addımlarınız impulsla deyil, düşünülmüş niyyətlə müəyyənləşəcək. Daha sonra vəziyyəti anlamaq üçün bu sualları verin:

* "Artıq nələri nəzərdən keçirmisiniz?”

* "Bunun arxasında nə dayandığını izah edə bilərsinizmi?”

* "Hazırda məndən sizə nə lazımdır?”

Gərginliyi asanlıqla idarə etməyiniz

Münaqişə zamanı insanlar çox vaxt iki ifratdan birinə düşür: ya qarşıdurmadan qaçır, ya da onu daha da dərinləşdirir.

Yüksək emosional intellektə malik şəxslər isə sakitliyini qoruyur, problemi birbaşa müzakirə edir və heç kimin etibarını sarsıtmadan çıxış yolu tapmağı bacarır.

Güclü tənqidi düşüncəyə sahib olmağınız

Bu bacarıq hazırda xüsusilə dəyərlidir. Süni intellekt məlumatları sürətlə təhlil edə və tövsiyələr verə bilər. Lakin emosional intellekti yüksək olan insanlar alqoritmin təqdim etdiyi ilk cavabla kifayətlənmir.

Onlar belə suallar verir:

* "Burada nə çatışmır?”

* "Bu məlumatlarda kimin baxış bucağı nəzərə alınmayıb?”

* "Bu, həqiqətən iştirak edən insanlar üçün məntiqlidirmi?”

Süni intellekt dövründə tənqidi düşüncə, təqdim olunan cavabları nə zaman şübhə altına almağın vacib olduğunu dərk etmək deməkdir.

Uolş hər günün sonunda özünüzə bu sualı verməyi tövsiyə edir: "Bu gün hansı hallarda yaxşı lider oldum və harada özümə mane oldum?” O, həmçinin etibar etdiyiniz birindən soruşmağın faydalı olduğunu qeyd edir: "Məni lider kimi çətinlik çəkdiyim və ən yaxşı formada olduğum anlarda nə vaxt görmüsən?”

Aydın