Azərbaycan niyə özünün ayaqqabı brendini yarada bilmir? (ŞƏRH)

 

Bunu Qaynarinfo-ya açıqlamasında VI çağırış Milli Məclisinin sabiq deputatı Rüfət Quliyev Azərbaycan istehsalı olan ayaqqabıların Avropa bazarlarına ixracından danışarkən deyib. 

Rüfət Quliyevin sözlərinə görə, Azərbaycan istehsalı olan ayaqqabılar dünya bazarına çıxa bilər:

"Burada söhbət yüksək formada, yəni fabrik deyil, daha çox əl üsulu ilə istehsal olunan ayaqqabılardan gedir. Azərbaycan üçün böyük bazar açılır. Nəzərə almaq lazımdır ki, dünya bazarında Türkiyə və başqa ölkələrin istehsalçıları var". 

 

Rüfət Quliyev qeyd edib ki, Azərbaycan artıq istehsal olunan malların brendləşməsinə təkan verməlidir:

"Yəni bilinməlidir ki, bu brend Azərbaycanda natural dərilərdən istehsal olunan əl işidir. Bunu mütləq nəzərə almaq lazımdır ki, onlar üçün Avropada və inkişaf edən Asiya ölkələrində böyük bazar var. Məsələn, natural dəridən hazırlanan kəmərlərin xarici bazar qiymətləri ən azı 25-35 dollar arasındadır. Düşünürəm ki, bu bazarlarda yer tutmaq üçün bizim kifayət qədər imkanlarımız var. Bundan əlavə əl çantaları, xüsusi ilə kişi və qadınlar üçün olan bu aksesuarların da gələcəyi var. Əsas odur ki, natural dəri və keyfiyyətli tikiş olsun və ən vacibi onların brendlərinin, yəni tanınan ticarət markalarının yaranmasıdır".

 

Rüfət Quliyev belə şəxsləri CBC kanalında yayımlanan "Sahibkar saatı"na dəvət edib: 

"İşləri barəsində məlumat versinlər. Onlar tək Azərbaycanda deyil, onlarla ölkədə reklam olunacaqlar. Azərbaycanda tam şərait var, artıq nə lazımdır? Yerli istehsalıçılar bu şəraitdən istifadə etməlidirlər. Əgər söhbət xüsusi təyinatlı ayaqqabılardan gedirsə, Azərbaycan üçün böyük imkanlar açılır".

Qeyd edək ki, İqtisadiyyat Nazirliyinin tabeliyində fəaliyyət göstərən İqtisadi Zonaların İnkişafı Agentliyinin (İZİA) idarəçiliyində olan Ağdam Sənaye Parkının rezidenti "BAFCO İnvest” MMC ayaqqabı istehsalı sahəsində EN ISO 20345:2022 və EN ISO 20347:2022 beynəlxalq standartlara uyğunluq sertifikatlarına layiq görülüb. Bu sertifikatlar şirkətin istehsal etdiyi məhsulların Avropa bazarına ixracına imkan yaradır.