"İran ABŞ prezidentinin son addımlarından narahat olduğundan əl-ayağa düşüb. Ona görə də Azərbaycan və digər dövlətləri işə salmağa çalışır ki, Qərbin ona qarşı hücumu olmasın".

Qaynarinfo-ya açıqlamasında bunu konfliktoloq Üzeyir Şəfiyev İran prezidentinin siyasi məsələlər üzrə müşavirinin Bakıya dünən olan səfərinin ardınca, prezident Məsud Pezeşkianın özünün də bu ay ərzində Azərbaycana səfər edəcəyi barədə məlumatı şərh edərkən deyib.

Ekspert düşünür ki, İranın beynəlxaq durumu heç də ürəkaçan deyil:

"Bu ölkə geosiyasi güclər tərəfindən küncə sıxışdırılıb. Son dövrlər ABŞ və İsrailin sərt təhdidi altındadır. Tehran ABŞ və İsrailin marağı olan coğrafiyalardan maksimum geri çəkilməli, proksilərə dəstəyə son qoymalı, nüvə dövləti ambissiyasından imtina etməlidir. Bunlara əməl etməsə, yaxın perspektivdə ola bilsin, İran ABŞ və İsrail tərəfindən real zərbələrə tuş gəlsin".

Konfliktoloq deyir ki, İran ətrafındakı mövcud vəziyyət regionun digər dövlətləri, həmçinin Azərbaycan üçün də demoqrafik baxımdan təhlükə yaradır:

"O baxımdan Azərbaycan açıq və gizli yollarla çalışır ki, İrana qarşı dağıdıcı prosesi tətbiq olunmasın. Bakı çalışır ki, ABŞ-ın İrana münasibətdə qəzəbi yumşalsın və Tehran da öz növbəsində tələbləri qəbul etsin. İran prezidentinin müşavirinin Bakıya gəlişi, ardınca da Pezeşkianın özünün Azərbaycana səfər edəcəyi Tehranın çabasının nəticəsidir. İran çabalayır, çalışır ki, ona qarşı bu hücum olmasın. Yəni narahat olduğundan əl-ayağa düşüb. Azərbaycan və digər dövlətləri işə salmağa çalışır ki, ona qarşı hücum olmasın. Çünki bu hücumla İran öz varlığını itirə bilər. Belə demək mümkünsə, Tehran bu məsələdə Azərbaycandan yardımçı dövlət kimi yararlanmaq istəyir".

Həmsöhbətimiz qeyd edir ki, yaxın və orta perspektivdə İran-Azərbaycan münasibətləri heç də rəvan olmayacaq:

"Azərbaycanla İran münasibətlərinə gəldikdə, Tehran bəzən ölkəmizə qarşı hörmətsizlik, qeyri-etik davranışlar sərgiləyir. İran Azərbaycanın güclü olmasını həzm edə bilmir. Yəni İran üçün Azərbaycan böyük bir narahatlıq mənbəyidir. Tehran Azərbaycan Ermənistan münasibətlərinin tənzimlənməsində də maraqlı deyil. Nəticədə tərəflər arasında hamarlaşma gözlənilmir".

Qeyd edək ki, İran prezidenti Məsud Pezeşkian Azərbaycana səfər edəcək. Səfərin bu ay baş tutması nəzərdə tutulub. Dünən isə İran Prezidentinin siyasi məsələlər üzrə müşaviri Mehdi Sənayi Bakıda səfərdə olub. Yəni görünən odur ki, bu dövrdə İranın yüksək səviyyəli rəsmilərinin Azərbaycana səfərləri intensivləşir. Hansı ki, hazırda İran ABŞ prezidenti Donald Trampın ciddi təpkisi altındadır. Tramp bu ölkəni nüvə silahı yaratmaqdan əl çəkməyə səsləyib. Əks təqdirdə isə İranı ağır günlərin gözlədiyi barədə xəbərdarlıq edib.

Rüfət Sultan