Qaynarinfo "Interesting Engineering”ə istinadla yazır ki, mühəndislik işləri Böyük Britaniyadan idarə olunacaq. Qarşıya qoyulan məqsəd sürətlə istehsal edilə bilən və döyüş meydanına çıxarılan müdafiə potensialı yaratmaqdır.

Britaniyanın "Babcock International” müdafiə şirkəti, gəmiləri və sahil infrastrukturunu kiçik hücum dronlarından qorumaq üçün Estoniyanın "Frankenburg Technologies” startapı ilə konteyner tipli raket buraxılış sistemi üzərində əməkdaşlıq planlarını elan edib. Şirkətlər dronlara qarşı "yeni və əlçatan" dəniz müdafiə sisteminin birgə hazırlanması haqqında anlaşma memorandumu imzalayıblar.

Təklif olunan sistem "Babcock”un hərbi dəniz inteqrasiyası və modul platformalar sahəsindəki təcrübəsini "Frankenburg”un aşağı maliyyə xərcləri ilə başa gələn raket texnologiyası ilə birləşdirəcək. Şirkətlərin birgə bəyanatına görə, sistem konteyner formatında nəzərdə tutulub ki, bu da onu əsaslı dəyişikliklər etmədən müxtəlif gəmilərə və ya stasionar nöqtələrə sürətlə quraşdırmağa imkan verəcək.

Müəlliflər qeyd edirlər ki, bu təşəbbüs Avropa hərbçilərinin müşahidə və ya partlayıcı hücumlar üçün istifadə edilə bilən ucuz dronların yayılması ilə bağlı artan narahatlığını əks etdirir:

"Ukraynadakı müharibə göstərdi ki, nisbətən ucuz pilotsuz sistemlər bahalı raketlərə və ya mürəkkəb radiolokasiya şəbəkələrinə arxalanan ənənəvi hava hücumundan müdafiə sistemlərini necə iflic edə bilər".

"Frankenburg”un baş icraçı direktoru Kusti Salm qeyd edib ki, dron təhlükəsi müharibənin xarakterini dəyişib və indi "hər bir müdafiə səviyyəsi başlanğıcdan kütləvi istehsal və sürət nəzərə alınmaqla hazırlanmalıdır".

Tallin mərkəzli "Frankenburg” şirkəti ənənəvi alternativlərdən təxminən 10 dəfə ucuz və 100 dəfə daha sürətli istehsal olunan raket sistemləri yaratmağı hədəfləyir.

"Frankenburg”un təklifinin mərkəzində şirkətin dünyanın ən kiçik idarə olunan raketi kimi təsvir etdiyi "Mark 1” raketi dayanır. Uzunluğu təxminən 60 santimetr olan bu silah kommersiya baxımından əlçatan komponentlərdən istifadə edilməklə kütləvi istehsal üçün nəzərdə tutulub. Raket bərk yanacaqlı mühərriklə təchiz edilib və yaxın mənzilli hava hücumundan müdafiə sistemləri üçün optimallaşdırılıb. Şirkət ilkin mərhələdə gündə 100 ədədədək raket istehsal etməyi hədəflədiyini bildirib.

"Babcock” ilə razılaşmaya əsasən, birgə hazırlanan sistem dəniz mühitində hərbi qulluqçuların və mühüm infrastrukturun qorunması üçün genişləndirilə bilən kinetik müdafiəyə fokuslanacaq. Əməkdaşlığın Avropadan kənara ixrac imkanları açacağı da gözlənilir.

UNİAN-ın yazdığına görə, analitiklər Ukrayna hərbçiləri tərəfindən dəniz və sualtı dronların yaradılmasını və istifadəsini hərbi əməliyyatlarda "yeni səhifə" adlandırıblar. Xüsusilə Novorossiysk limanında Rusiya sualtı qayığının məhv edilməsi əməliyyatı belə qiymətləndirilib.

Bundan əlavə, Rusiyanın "kölgə donanması"na aid neft tankerlərindən birinə zərbə zamanı dron operatorları o qədər ustalıqla hərəkət ediblər ki, tankerin maşın şöbəsini məhv etsələr də, ekologiya üçün heç bir təhlükə yaratmayıblar.

Təqdim etdiyimiz video Estoniyanın "Frankenburg” startapı tərəfindən hazırlanan "Mark 1” raketinin necə işlədiyini və Avropanın müdafiə ekosistemindəki əhəmiyyətini əyani şəkildə izah edir.

Alpər