Qidalanma sağlam qan təzyiqinin nəzarətində və saxlanmasında əsas rol oynayır, çünki o, qan damarlarının funksiyasına, iltihaba və maddələr mübadiləsinə təsir göstərir. Arterial təzyiqə müsbət təsir göstərən məhsullar arasında bəlkə də istifadə etmədiyiniz bir məhsul var - bu da zəncəfildir.

Qaynarinfo xəbər verir ki, bunu "Eatingwell" yazıb.

Məqalənin məzmunu diyetoloq Keyti Devidson tərəfindən yoxlanılaraq təsdiqlənib.

"Zəncəfil, əsasən, qinqerollar və şoqaollar olmaqla bir neçə bioaktiv birləşmə ehtiva edir ki, bunlar da bir neçə mexanizm vasitəsilə qan təzyiqinə müsbət təsir göstərməyə kömək edir", deyə sertifikatlaşdırılmış diyetoloq Mişel Rutinşteyn "ScienceDirect" səhifələrində dərc olunmuş tədqiqatında bildirib.

Nəşriyyat zəncəfilin təzyiqin idarə edilməsinə kömək edən üç üstünlüyünü açıqlayıb.

Zəncəfil qan damarlarının rahatlaşmasına kömək edir

Zəncəfildə qinqerollar və şoqaollar də daxil olmaqla 400-dən çox bioaktiv birləşmə var ki, bunlar ürək sağlamlığını dəstəkləyə bilər. "Cureus" səhifələrində çıxan bir tədqiqat göstərir ki, bu birləşmələr qan damarlarının divarlarının rahatlaşmasına və qan təzyiqinin bir qədər aşağı düşməsinə səbəb ola bilər. Lakin, alimlər yeməklə birlikdə adətən istehlak etdiyimiz deyil, daha yüksək dozalarda zencefilin təsirini öyrəniblər, ona görə də bu daha kiçik dozaların eyni təsirə malik olub-olmadığı məlum deyil.

Qeydiyyatdan keçmiş diyetoloq Mindi Haar da qeyd edib ki, zəncəfilin potensial üstünlükləri əsasən, ikinci tip diabet kimi digər xəstəlikləri olmayan gənclərdə müşahidə olunub.

Zəncəfil iltihabı azalda bilər

"Qinqerollar, şoqaollar və digər birləşmələr antioksidant və antiiltihab xüsusiyyətlərə malikdir ki, bunlar da qan damarlarını oksidativ zədələnmədən qorumağa kömək edə bilər",deyə Rutinşteyn bildirib.

Lakin bu halda da tədqiqatların əksəriyyəti qida və ya içkilərdəki zəncəfilə deyil, zəncəfil qida əlavələrinə yönəlib, ona görə də qidadakı zəncəfildən istifadənin eyni üstünlükləri təmin edib-etmədiyi aydın deyil.

Buna baxmayaraq, etibarlı şəkildə məlumdur ki, pəhrizə zəncəfilin daxil edilməsi ümumi sağlamlığı dəstəkləməyə kömək edəcək.

Zəncəfil duzu əvəz edə bilər

Zəncəfil yeməklərə doymuş, ətri dad verir ki, bu da sizə duz və yüksək natrium tərkibli inqredientlər istehlakını azaltmağa kömək edə bilər.

Amerika Ürək Assosiasiyasının məlumatlarına görə, həddindən artıq duz qəbulu xroniki yüksək qan təzyiqinə səbəb ola bildiyindən, zəncəfil və ya digər doymuş ədviyyatların əlavə edilməsi dadı yaxşılaşdırmaqla yanaşı, ürək sağlamlığını dəstəkləmək üçün sadə bir üsuldur.

Nə qədər zəncəfil qəbul edilməlidir?

Zəncəfilin qan təzyiqi üçün faydası barədə tədqiqatlar hələ də yekun nəticəyə gəlmədiyindən, sağlamlıq üçün nə qədər zəncəfil qəbul edilməli olduğunu dəqiq demək çətindir. Ümumiyyətlə, nəşriyyatın qeyd etdiyi kimi, qan təzyiqinin yaxşılaşması tez-tez gündə təxminən 3 qram xam zəncəfil (təxminən 1,5 çay qaşığı) ilə müşahidə olunur.

"Dəqiq cavab vermək üçün daha çox tədqiqat aparılmalıdır və hər bir insan öz həkimi ilə məsləhətləşməlidir", deyə Haar vurğulayıb.

Zəncəfil hamı üçün təhlükəsizdirmi?

Zəncəfil adətən, mülayim miqdarlarda təhlükəsizdir, lakin yüksək dozalar müəyyən dərmanlarla, o cümlədən qan incəldici dərmanlar və yüksək qan təzyiqinin müalicəsi üçün bəzi preparatlarla qarşılıqlı təsir göstərə bilər.

"Qan təzyiqi dərmanları qəbul edən insanlar arterial təzyiqlərinə diqqətlə nəzarət etməlidirlər, çünki pəhrizdə zəncəfilin əlavə edilməsi kimi dəyişikliklər onun həddindən artıq aşağı düşməsinə səbəb ola bilər", deyə Rutinşteyn qeyd edib.

Bundan əlavə, diyetoloqların sözlərinə görə, bəzən çox miqdarda zəncəfil qəbulu mədə pozuntusuna və ya həzm ilə bağlı digər problemlərə səbəb ola bilər.

Zəncəfil barədə hər hansı bir şübhəniz varsa və ya müəyyən dərmanlar qəbul edirsinizsə, ən yaxşısı qidalanma şəklini dəyişməzdən əvvəl həkiminizlə məsləhətləşməkdir. Eyni zamanda, ekspertlərin fikrincə, yadda saxlamaq lazımdır ki, zəncəfil nə qədər faydalı olursa olsun, onu pəhrizə əlavə etmək dərmanla müalicəni əvəz etməyəcək.

Aydın