Vurğun Hüseynov: “Şəhərin tək komandasıdır, ailəsinə çörəkpulu aparanlar var”

"Sumqayıt”ın kapitanı Vurğun Hüseynov bu qarşılaşmada sarı vərəqə limitini doldurduğu üçün meydana çıxa bilmədi. 35 yaşını bu gün tamamlayan təcrübəli müdafiəçi Qaynarinfo-ya açıqlamasında məğlubiyyətin səbəblərini belə izah etdi:

"Həqiqətən oyuna yaxşı hazırlaşmışdıq. Hesabda 2:0 öndə olduğumuz oyunda gözlənilməz şəkildə uduzduq. Düşünürəm ki, belə məqamlar 100 oyundanbir olur. 18 dəqiqəyə 3 qol buraxmaq həqiqətən ağırdır. İnşallah əlimizi, qolumuzu yanımıza salmayacağıq. Baxımlı oyun var. Bu matçı yaddan çıxarmağa məcburuq. Çünki daha çətin Gəncə səfəri var”.

"90-cı dəqiqədən sonra iki gözəl qol epizodumuz oldu. Fiziki cəhətdən zəif olsaydıq heç rəqib qapının qarşısına çıxıb gedə bilməzdik. Sadəcə, bir qədər arxayınlıq oldu, oyuna köklənə bilmədik. Düşünmədiyimiz anlarda qollar buraxdıq. Əminəm ki, bu durumdan çıxacağıq. Uşaqlarla söhbət etdik. Futboldur, bundan dərs çıxarıb tam ciddiyyətlə növbəti oyuna hazırlaşacağıq. Buna məcburuq, başqa variantımız yoxdur. Bu dəfə uduzsaq, sonuncu yerə düşə bilərik. Şəhərin tək komandasıdır, nə qədər insan çalışır. Ailəsinə çörəkpulu aparanlar var. İnşallah əl-ələ verib bu durumdan çıxacağıq. Məğlubiyyəti unudub, növbəti oyuna hazırlaşacağıq. Hər halda əlimizə qılınc alıb irəli getməyəcəyik, ağıllı oynayacağıq, öz oyun üslubumuz var. Məşqçinin tapşırılqarına əsasən meydana çıxıb mübarizə aparacağıq”.

"Futbol kollektiv oyundur. İstər hücumçunun, istər son müdafiəçinin etdiyi səhv komandanın başında "çatlayır”. Qol buraxılırsa bütün komandanın günahı var. Qol vururuqsa hamının əməyi var. Müdafiəçi və ya hücumçuları fərqləndirmək olmaz. Mən oynamadım, amma səhvim oldu. Ola bilər ki, kapitan kimi hansısa futbolçu ilə danışmamışam. Uduzmuşuqsa, hər birimizin səhvi var”.