ISW: Şimali Koreyanın cəbhəyə göndərdiyi əsgərlər Rusiyanın həftəlik itki normasıdır

Qaynarinfo xəbər verir ki, bu barədə Müharibə Araşdırmaları İnstitutu (ISW) öz hesabatında yazıb.

ABŞ müdafiə naziri Lloyd Ostin bildirib ki, Rusiya qüvvələri gündə 1200-dən çox insan itirir (və ya təxminən ayda 36 000), ABŞ-ın son qiymətləndirmələrinə görə, Rusiyanın aylıq səfərbərlik gücü 25 000-dən 30 000-dək yeni əsgərdir. Bu isə onu göstərir ki, Rusiya hazırkı cəbhə itkilərini birin birə nisbətində əvəzləyə bilmir.

"Kursk bölgəsində döyüşlərə qatılmağa hazırlaşdığı deyilən 8 000 şimali koreyalı əsgər bu halda cəbhə xətti boyunca təxminən həftəlik itkiləri əvəzləyir. Şimali Koreya Rusiyaya ümumilikdə 12 000 hərbçi göndərib”, - o deyib.

ISW qeyd edir ki, Rusiyanın Şimali Koreya muzdlu qüvvəsindən necə istifadə edəcəyi hələ aydın deyil, lakin Rusiya tərəfindən həyata keçirilən yüksək itkilərlə nəticələnən hücum əməliyyatlarında Şimali Koreya əsgərlərinin iştirakı, ehtimal ki, onların arasında da yüksək itkilərə səbəb olacaq.

ISW son qiymətləndirməsində Şimali Koreyanın, müasir müharibədə dəyərli döyüş təcrübəsi qazanmaq üçün Rusiyanın tərəfində müharibədə iştirak etmək qərarına gəldiyini qeyd edib. Lakin vurğulanıb ki, Rusiya komandanlığının Şimali Koreya qüvvələrini döyüşlərdə necə istifadə edəcəyi, onların döyüş təcrübəsini mənalı şəkildə mənimsəmə qabiliyyətinə təsir göstərəcək. Əgər Şimali Koreya qoşunları ruslar kimi ağır itkilər versə, Pxenyanın döyüş meydanında öyrənmək istədiyi dərslər təhlükə altında olacaq və Kim öz qoşunlarını uzun müddət belə itkilərə məruz qoymağa çətin ki, razı olsun.