Rüfət Nasosnu: "İndiki meyxanaları mərsiyə ediblər, bir az da mədhiyə..."

Bu barədə Qaynarinfo-ya onun özü məlumat verib. 

Meyxanaçı həmkarlarını meydanlara dəvət edib:

 

"Çoxdandır ki, meyxana meydanları boşdur, deyişmələr keçirilmir. Mən özüm də meydanlara çıxmırdım, belə şeylərə baş qoşmurdum. Odur ki, meyxana sənətində meydanlar sakit idi. Vüqar dünyasını dəyişib, Rəşad həbsdə, Pərviz uzaqlaşıb, ifaçıların hərəsi bir yanda. Deyişmə üçün uyğun adamlar azdır. Ona görə də meyxanadan bir az soyumuşdum. İndiki meyxanaları da ediblər mərsiyə, bir az da mədhiyə. Meyxana sənətində şirinlik qalmayıb. Son günlər iki-üç məclisdə oldum, dostlar, xiridarlar kim qulaq asırsa, deyirlər ki, qayıt meydanlara, əvvəlki şirinlik lazımdır”.

Rüfət Nasosnu hesab edir ki, sənətin ölməməsi üçün belə yarışmaların keçirilməsi vacibdir:

"Rəşadın, Vüqarın olmadığı meydan darıxdırıcıdır, istər-istəməz onların yeri görünür. Köhnə dostlarla meyxana demək üçün çox darıxmışam. İndi ən böyük arzularımdan biri köhnə dostlarla meyxana deməkdir. Aydın qayıda, Kərim də sağlam olaydı, Elçinlə isə meydanda olmamışam. Mən sənətə qayıdanda bunlarla deyişdim. O vaxtlar Sumqayıt dəstəsi də vardı. Cavid, Elşən, dünyasını dəyişən İlkin və başqaları vardı ki, onlarla bir ayrı deyişmələrimiz olub. Rəşadla, Vüqarla meyxana demək üçün çox darıxmışam. Vüqarın qayıtması qeyri-mümkündür, nə vaxtsa Rəşad qayıdacaq. Bəlkə də qayıdandan sonra mən meyxana demək istəmərəm. Çünkü doymaq istəyirəm”.

Rüfət Nasosnu bu gün meyxananı sırf çörəyi üçün dediyini də xatıaladıb:

"Ruzim ondan çıxır. İnanırsınız, başqa iş tapsam, yaxud da qazanc yerim olsa, meyxananın ardınca getmərəm. Çünki meyxananın əvvəlki  ləzzəti yoxdur”.