Bəzi meyvə şirələri qan şəkərinin kəskin yüksəlməsinə səbəb ola bilər. Endokrinoloq həkimlər xüsusilə portağal şirəsinin qlükoza səviyyəsində daha nəzərəçarpan sıçrayışlara səbəb ola biləcəyini bildirirlər.

Qaynarinfo xəbər verir ki, bu barədə "Parade” nəşri məlumat yayıb.

Şəkərin kəskin artmasına nə səbəb ola bilər?

Qan şəkərini azaltmaq üçün ən çox verilən tövsiyələrdən biri şirin qidaların qəbulunu məhdudlaşdırmaqdır. Bu məsləhət hər nə qədər xoş görünməsə də, bir sıra xəstəliklərin qarşısının alınması və nəzarətdə saxlanması üçün faydalıdır.

"Hackensack Meridian Jersey Shore University Medical Center” tibb mərkəzinin endokrinologiya şöbəsinin rəhbəri Cennifer Çenq bildirir ki, insanlar adətən şirniyyatların zərərli olduğunu yaxşı anlayırlar, lakin içkilərdə olan şəkərin miqdarını çox vaxt nəzərə almırlar.

Onun sözlərinə görə, meyvə şirələrində xeyli miqdarda həll olunmuş şəkər ola bilər və bu da qanda qlükoza səviyyəsinə ciddi təsir göstərə bilir.

Həkim qeyd edir ki, bərk qidalardan fərqli olaraq maye şəkərlər eyni dərəcədə toxluq hissi yaratmır. Bu səbəbdən insan daha çox şəkər qəbul etdiyini hiss etmədən içkilər vasitəsilə əlavə kalori və şəkər ala bilər.

Şəkəri artıran şirələr

Portağal şirəsi uzun illərdir səhər yeməyinin ən populyar içkilərindən biri hesab olunur. Lakin mütəxəssislərin sözlərinə görə, məhz onun tərkibi və geniş istifadə olunması qan şəkərinin artması baxımından problem yarada bilər.

Cennifer Çenq bildirir ki, orqanizm portağal şirəsindəki yüksək şəkər miqdarına sürətli reaksiya verir.

ABŞ Milli Tibb Kitabxanasının məlumatına görə, portağal şirəsinin qlikemik indeksi təxminən 34–51 aralığında dəyişir. Bu göstərici orta səviyyə hesab olunsa da, məhsulun tərkibi də mühüm rol oynayır.

Mütəxəssislər qeyd edirlər ki, bütöv portağalda olan lif şirədə demək olar ki, yoxdur. Lif isə şəkərin qana sorulmasını yavaşladaraq qlükoza səviyyəsinin daha stabil qalmasına kömək edir.

Şirə içildikdə isə orqanizm qanda şəkərin artmasını kompensasiya etmək üçün daha çox insulin ifraz edir. Bu isə qlükozanın hüceyrələrə sürətlə daxil olmasına səbəb olur və nəticədə qanda şəkərin səviyyəsi kəskin dəyişə bilər.

Həkimlərin sözlərinə görə, portağal şirəsinin müntəzəm və çox miqdarda qəbulu həm qısa, həm də uzunmüddətli metabolik dəyişikliklərə səbəb ola bilər.

Birdəfəlik şəkər sıçrayışı belə yorğunluq hissi yarada və sonradan şirin qidalara meyli artıra bilər. Şirin içkilərin davamlı istifadəsi isə insulinə qarşı müqavimətin yaranma riskini yüksəldir ki, bu da gələcəkdə diabetə gətirib çıxara bilər.

Diabet zamanı hansı içkiləri seçmək olar?

"Nutrition and Diabetes” jurnalında dərc olunan araşdırmaya görə, sağlam insanların əksəriyyəti portağal şirəsi qəbul etdikdən sonra ciddi problemlə qarşılaşmır.

Hətta bəzi hallarda 2-ci tip diabeti olan şəxslərə qanda şəkər səviyyəsi təhlükəli dərəcədə aşağı düşdükdə təxminən 100 ml portağal şirəsi içmək tövsiyə oluna bilər. Bu, qlükoza səviyyəsini sürətlə yüksəltməyə kömək edir.

Həkim Cennifer Çenq vurğulayır ki, əsas prinsip ölçülü istehlakdır. Diabet xəstələrinə, qan şəkəri aşağı olmadığı hallarda, portağal şirəsinin qəbulunu məhdudlaşdırmaq məsləhət görülür.

Bununla yanaşı, portağal şirəsi C vitamini ilə zəngindir və bu vitamin insulin fəaliyyətini müəyyən dərəcədə dəstəkləyə bilər. Lakin mütəxəssislər bildirir ki, şəkərin səviyyəsinə fərdi reaksiyanı nəzərə almaq vacibdir.

Portağalın dadını qorumağın və daha çox fayda əldə etməyin ən yaxşı yolu isə meyvəni bütöv şəkildə yeməkdir. Bu zaman orqanizm həm lif, həm də emal zamanı qismən itirilən digər vitaminləri qəbul edir.

Mütəxəssislər səhər içkisi kimi suyu (limon, laym və ya nanə ilə), şəkərsiz yaşıl və ya qara çayı, həmçinin qəhvəni daha uyğun alternativlər hesab edirlər.

Şirədən tam imtina etmək çətindirsə, porsiyanın həcmini azaltmaq və onu zülal və faydalı yağlar ehtiva edən qidalarla birlikdə qəbul etmək tövsiyə olunur. Bu, şəkərin qana sorulmasını yavaşlada və qlikemik yükü azalda bilər.

Aydın