Böyük Britaniya ilk dəfə bir nəsil ərzində partlayıcı maddələrin kütləvi istehsalını həyata keçirəcək, məqsəd isə ABŞ ordusundan asılılığını aradan qaldırmaqdır.

Qaynarinfo "The Times"a istinadən xəbər verir ki, Müdafiə Nazirliyi potensial sursat istehsalı zavodları üçün Britaniyada ən azı 13 ərazi ayırıb. Bu zavodlar geniş miqyasda partlayıcı maddələr, raket yanacağı və alışdırıcı sistemlər istehsal edəcək.

Əvvəllər Parlamentin Müdafiə Komitəsi Britaniyanın illərlə müdafiəyə kifayət qədər vəsait ayırmaması və ABŞ-ın atəş gücü, hərbi texnika və kəşfiyyat məlumatlarına asılılığı səbəbindən özünü müdafiə edə bilməyəcəyi barədə xəbərdarlıq etmişdi.

Deputatlar hökuməti Britaniya Silahlı Qüvvələri tərəfindən istifadə olunan ABŞ hərbi sistemlərinin mümkün qədər tez əvəzlənməsinə çağırıb. Onlar bildiriblər ki, böyük ehtimalla ABŞ prezidentinin prioritetlərinin dəyişməsi səbəbindən ABŞ Avropadan şəxsi heyət və texnikanı çıxaracaq, bu isə NATO müttəfiqlərini zəif vəziyyətə qoyacaq.

Müdafiə Nazirliyinin məlumatına görə, ilk obyektin tikintisinin gələn il başlayacağı gözlənilir və bu obyektlər Britaniya və Ukrayna arsenallarını təmin edəcək. Uğur qazanan müdafiə şirkətləri hökumətin müəyyən tələblərinə əməl etməli və Britaniyanın dayanıqlılığı üçün vacib hesab olunan doqquz enerji materialını istehsal etməlidir.

Bu obyektlərin yerləşə biləcəyi 13 qraflıq arasında Kambria, Damfrişşir, Eyrişir, Şropşir, Çeşir, Derbişir, Esseks, Vusterşir, Hempshir, Pembrokşir və Sterlinqşir yer alır.

Apreldə "The Times" xəbər verib ki, Böyük Britaniya 155 mm-lik top mərmiləri və digər silahlar üçün istifadə olunan heksogen istehsal gücünü əhəmiyyətli dərəcədə artıracaq. Britaniyanın müdafiə şirkəti "BAE Systems" həmçinin layihənin dayanıqlığını artırmaq üçün üç yeni obyekt tikməyi planlaşdırır, belə ki, əgər onlardan birinə hücum olarsa, layihə təhlükəsizliyi qorunacaq.

Eyni zamanda, Müdafiə Komitəsi hesabatında yalnız sursatlarla bağlı deyil, həm də ABŞ dəstəyinin NATO müttəfiqlərinə azaldılması nəticəsində kəşfiyyat, peyk müşahidəsi, hərbi daşınmalar və hədəf aşkarlanmasında kritik boşluqlar yarana biləcəyini vurğulayıb.

Komitə sədri Tan Desi bildirib ki, Rusiya təcavüzü artan bir şəraitdə Böyük Britaniya və NATO müttəfiqləri ABŞ müdafiəsinə bel bağlayır və öz müdafiələrinə kifayət qədər sərmayə qoymur.

"Human Security Centre" analitik mərkəzinin doktoru Rouen Olport deyib: "NATO üçün ən pis ehtimal olunan ssenari ABŞ-ın Çinlə potensial müharibəsi və ya ən azı Çinlə bağlı böhranda fəal iştirakı, bu zaman Rusiyanın müdaxilə edərək vəziyyətdən faydalanmağa çalışmasıdır".

Müdafiə Nazirliyinin nümayəndəsi isə bildirib ki, müdafiə naziri tərəfindən Britaniyanın "müharibəyə hazırlığının gücləndirilməsi" planları ölkə daxilində təhlükəsizliyi və xaricdə gücü təmin edəcək.

Aydın