Qaynarinfo "Traveloffpath"a istinadən xəbər verir ki, bu şəhərun əsası Şimali Afrikadan gələn müsəlman məskunlaşanlar - mavrlar tərəfindən qoyulub. Onlar bir neçə əsr boyunca indiki İspaniya ərazisinin böyük hissəsinə nəzarət ediblər. Dünyada sivilizasiyalar inkişaf edib və yoxa çıxsa da, Kuenka uzun müddət dəyişməz qalıb.

Kuenka nə ilə məşhurdur?

Kuenka Xukar və Uekar çayları üzərində yerləşən əhəngdaşı qayalığında salınmış bir şəhərdir.

Burada yerləşən casas colgadas – taxta eyvanlı, sanki cazibə qüvvəsinə meydan oxuyan orta əsr evləri şəhərin unikal görünüşünü formalaşdırır. İspaniyada, hətta Avropada belə bir memarlıq üslubu demək olar ki, yoxdur. Elə bu səbəbdən şəhər UNESCO-nun Ümumdünya İrs Siyahısına daxil edilib. Lakin Kuenkanın cəlbediciliyi yalnız bu evlərlə məhdudlaşmır.

Şəhərin qədim hissəsinə – möhkəm qala divarları ilə əhatələnmiş, daş döşənmiş dar küçələri və pastel rəngli binaları ilə fərqlənən tarixi mərkəzinə daxil olduqda, sanki XV əsrə səyahət edirsiniz. Burada şəhərin müsəlman dövründən qalan planlaşdırılması demək olar ki, toxunulmaz qalıb. Əlbəttə ki, müasir dövrə aid yeniliklər – mobil telefon təmiri emalatxanaları və ənənəvi tavernaları əvəz edən tapas barlar da mövcuddur.

Şəhərin ən möhtəşəm tikililərindən biri Kuenka kafedralıdır. Rəngarəng mənzərə fonunda yüksələn bu qotik üslublu memarlıq incisi şəhərin simvollarından biridir.

Əgər məşhur asma evlərdən birinin daxili görünüşünü görmək istəyirsinizsə, İspan Abstrakt İncəsənəti Muzeyini ziyarət edə bilərsiniz. Bu, Kuenkadakı asma evlərdən birinə daxil olmaq və onun əsrlərdir qorunan bünövrəsini görmək üçün yeganə şansınızdır. Üstəlik, giriş pulsuzdur.

Kuenka nə üçün ucuzdur?

Bu şəhər İspaniyanın digər məşhur turizm məkanları ilə müqayisədə nisbətən az tanınır. 2024-cü ildə rekord turist axını qeydə alınsa da, bu rəqəm cəmi 450 min nəfər təşkil edib ki, bu da ölkənin ümumi turist sayının cəmi 0,4%-nə bərabərdir.

Bununla yanaşı, Kuenka ziyarətçilər üçün münasib qiymətləri ilə də seçilir. Məsələn, bir barda tapas və sangriya təxminən 8-10 ABŞ dollarına başa gəlir. Köhnə şəhər mərkəzində orta səviyyəli bir restoranda üç yeməkdən ibarət nahar və ya şam yeməyi 20-45 dollar arasında dəyişir. Bu isə İspaniya üzrə ortalama qiymətlərdən aşağıdır.

Otellər də münasib qiymətə təklif olunur. Məsələn, şəhər mərkəzində yerləşən "Arevalos" otelində bir gecəlik qalmaq 53 dollar, daha sərfəli seçim olan "Hostal Cortes"də isə 38 dollar təşkil edir.

2025-ci ildə Kuenkaya necə getmək olar?

Kuenkada hava limanı olmadığından, ora səfər etmək üçün əvvəlcə Madriddə, Barselonada və ya Sevilyada enmək lazımdır. Bu şəhərlərdən Kuenkaya gedib çıxmaq üçün müəyyən vaxt sərf etmək tələb olunur.

Ancaq şəhər İspaniyanın dəmir yolu şəbəkəsi ilə yaxşı əlaqələndirilib. Məsələn, Madriddən AVLO sürətli qatarı ilə təxminən bir saata Kuenkaya çatmaq mümkündür. Bilet qiymətləri isə 8 dollardan başlayır.

Aydın