Biləsuvarın icra başçısı qalmaqallı şadlıq sarayında iftar süfrəsi təşkil edir (FOTO)

Qaynarinfo-nun məlumatına görə, müqavilədə iftar süfrəsinin təşkil edilməsi nəzərdə tutulur.

Müqavilənin maliyyə dəyəri 7 192 manatdır.

 

Satınalma proseduru birmənbə metodu ilə həyata keçirilib. Bu baxımdan iftar süfrəsinin neçə nəfər üçün nəzərdə tutulduğu məlum deyil.

Araşdırmalarımız zamanı məlum olub ki, Səbuhi Muxtarzadə Biləsuvar rayonunun Xırmandalı kəndində fəaliyyət göstərən "Nur” şadlıq sarayının sahibidir.

Azərbaycan Qida Təhlükəsizliyi Agentliyi (AQTA) ötən il "Nur” şadlıq sarayında yoxlama aparıb.

 

Yoxlama zamanı şadlıq sarayında texnoloji ardıcıllıq prinsipinin pozulduğu, temperaturun monitorinqi və qeydiyyatının aparılmadığı, mətbəx sahəsində havalandırma sisteminin quraşdırılmadığı, işçi masalarının korroziyaya davamlı və paslanmayan materialdan təşkil edilmədiyi, yemək hazırlanan qazanların sanitar-gigiyenik vəziyyətinin tələblərə cavab vermədiyi, mətbəxdə döşəmənin və qida məhsullarının saxlanıldığı soyuducu kameranın tavanının asan yuyula bilən gigiyenik materialla üzlənmədiyi, emal sahəsində drenaj sisteminin mövcud olmadığı, qida tullantılarının ağzı kip bağlanan qablara toplanmadığı, mütəmadi olaraq təmizlik işlərinin görülmədiyi və digər nöqsanlar aşkarlanıb.

 

Faktla bağlı fiziki şəxs barəsində inzibati protokol tərtib olunub, ictimai iaşə obyektinin mətbəxində işlərin görülməsi və xidmətlərin göstərilməsi nöqsanlar aradan qaldırılanadək müvəqqəti məhdudlaşdırılıb.

 

AQTA-nın məlumatında "Nur” şadlıq sarayının insan həyatı və sağlamlığı üçün təhlükə yaratdığı qeyd edilib. Obyektdə sağlamlaşdırma işləri aparıldıqdan sonra fəaliyyəti bərpa edilib.

 

 

Biləsuvar Rayon İcra Hakimiyyətinin başçısı Faiq Qürbətovdur. O, 2020-ci ildən rayona rəhbərlik edir.