Bələdiyyə seçkilərinə maraq niyə yoxdur? (ŞƏRH)

 

Bunu Qaynarinfo-ya açıqlamasında "Demokratiyanı Öyrənmə" İctimai Birliyinin sədri Mirəli Hüseynov yanvarın 29-da keçiriləcək bələdiyyə seçkilərində namizəd olaraq iştiraka marağın az olmasına münasibət bildirərkən deyib:

"Burada iki faktor önəmli rol oynayır. Birinci amil bələdiyyələrin statusu ilə bağlıdır. Bələdiyyələrin siyasi sistemdəki mövqeyi, yeri, onların malik olduğu səlahiyyətlər həmin qurumlara olan marağı əhəmiyyətli şəkildə azaldıb. Yəni  bələdiyyələr real idarəetmə qurumu kimi yetərli səlahiyyətlərə malik deyil. Özünüidarəetmə orqanları ciddi təsir imkanlarına malik deyil, onlar yerli problemlərin həllində əsas qurum kimi çıxış edə bilmirlər. Bələdiyyələrin cəmiyyətdə yerinin zəif olması həm də onun fəaliyyətində iştiraka olan marağı da azaldır". 

 

Həmsöhbətimizə görə, digər tərəfdən, seçkilərə olan inamın azlığı da bələdiyyələrə marağın aşağı olmasına gətirib çıxarıb.

Qeyd edək ki, yanvarın 29-na təyin edilmiş bələdiyyə seçkilərinə maraq aşağı səviyyədədir. Namizədlərin sayı elə də çox deyil. Artıq bu gündən başlayaraq bələdiyyə seçkilərində seçkiqabağı təşviqata başlanılır. Çünki qanunvericiliyə görə, təşviqat prosesi səsvermə gününə 23 gün qalmış başlanır və səsvermənin başlanmasına 24 saat qalmış dayandırılır.