Romantik münasibətlərin başlanğıcında insanların davranışları, seçimləri və hətta sifariş etdikləri içkilər belə dəyişir. Rumıniyada aparılan yeni araşdırma göstərib ki, gündəlik həyatda ən çox istehlak edilən spirtli içkilər ilk görüş zamanı demək olar ki, arxa plana keçir. Xüsusilə də pivə romantik görüşlərdə əvvəlki populyarlığını itirir.

Qaynarinfo xəbər verir ki, "Bookingham" tərəfindən 500-ə yaxın şəhər sakini arasında keçirilən sorğu ilk görüşlərdə insanların daha zərif və "təəssürat yaradan” seçimlər etdiyini ortaya qoyub. Araşdırmanın nəticələrinə görə, rumınlar gündəlik həyatda əsasən lager pivəsinə üstünlük versələr də, romantik görüş zamanı daha çox şərab və kokteyl seçirlər.

Sorğu iştirakçılarının 49 faizi gündəlik həyatlarında ən çox lager pivəsi içdiklərini bildirib. Sonrakı yerlərdə qırmızı şərab (34 faiz), ağ şərab (28 faiz) və çəhrayı şərab (27 faiz) qərarlaşıb. Buna baxmayaraq, ilk görüş zamanı tamamilə fərqli mənzərə yaranır.

Araşdırmaya görə, respondentlərin 41 faizi ilk görüşdə ümumiyyətlə spirtli içki qəbul etmədiyini deyib. İçki sifariş edənlərin böyük hissəsi isə şəraba üstünlük verir. Belə ki, iştirakçıların 37 faizi ilk görüşdə şərab sifariş etdiyini bildirib. Kokteylləri seçənlərin payı 14 faiz olub. Gündəlik həyatda ən populyar içkilərdən biri olan pivəni isə ilk görüşdə cəmi 4 faiz respondent seçib.

Maraqlı məqamlardan biri də viski ilə bağlıdır. Respondentlərin təxminən 21 faizi gündəlik həyatda viski içdiyini desə də, romantik görüş zamanı bu içkiyə üstünlük verənlərin sayı 2 faizdən də az olub. Araşdırma müəllifləri hesab edir ki, insanlar ilk görüşdə daha yumşaq və ünsiyyətə uyğun atmosfer yaradan içkilərə üstünlük verirlər.

Qadınlar və kişilər arasında da seçim fərqləri diqqət çəkib. Kişilərin 42 faizi ilk görüş zamanı şərab sifariş etdiyini bildirib. Halbuki gündəlik həyatlarında onlar əsasən pivə və viskiyə üstünlük verirlər. Qadınlar arasında isə kokteyl seçimi daha populyardır. Respondent qadınların 22 faizi ilk görüşdə kokteyl sifariş etdiyini deyib. Gündəlik həyatda isə onların daha çox çəhrayı şərab, prosecco və ya meyvə əsaslı içkilər seçdiyi məlum olub.

Araşdırmada nəsillər arasındakı fərqlər də təhlil edilib. Z nəslinə aid olan 18-25 yaş arası gənclər gündəlik həyatda ən müxtəlif spirtli içkiləri istehlak edən qrup kimi seçilib. Onlar pivə, viski, araq və kokteyllər arasında daha sərbəst seçim etsələr də, ilk görüş zamanı 43 faizinin şəraba üstünlük verməsi diqqət çəkib. Bu göstərici bütün yaş qrupları arasında ən yüksək nəticə hesab olunur.

Ən ehtiyatlı yanaşmanı isə X nəslinin nümayəndələri göstərib. 46-55 yaş arası respondentlərin 51 faizi romantik görüşlərdə ümumiyyətlə spirtli içki qəbul etmədiyini bildirib. Minillik nəsli isə əsasən iki seçim arasında bölünüb: ya şərab sifariş etmək, ya da tamamilə içkidən imtina etmək.

Sorğuda gündəlik istehlak zamanı ən çox adı çəkilən brendlər arasında "Ursus", "Jack Daniel's" və "Heineken" yer alıb. Lakin araşdırma göstərib ki, ilk görüş zamanı insanlar konkret brend seçiminə deyil, daha çox içkinin yaratdığı ümumi təəssürata diqqət yetirirlər.

Mütəxəssislər hesab edir ki, ilk görüşlərdə şərabın populyar olması onun daha romantik və zərif içki kimi qəbul edilməsindən qaynaqlanır. Kokteyllər isə xüsusilə gənclər arasında sosial rahatlıq və ünsiyyət atmosferi yaratdığı üçün seçilir.

Araşdırmanın digər diqqətçəkən nəticəsi isə restoran mədəniyyəti ilə bağlı olub. Respondentlərin 73 faizi restoranlarda nadir hallarda və ya ümumiyyətlə spirtli içki sifariş etmədiyini bildirib. Bu isə ilk görüşləri spirtli içki sifariş edilən nadir sosial situasiyalardan birinə çevirir.

Qeyd edək ki, araşdırma 2025-ci ilin dekabr ayında 493 şəhər sakini arasında onlayn sorğu əsasında aparılıb. Sorğuda ölkənin müxtəlif bölgələrindən fərqli yaş və gəlir qruplarını təmsil edən şəxslər iştirak edib.

Günay