"ATƏT-in Minsk Qrupunun ləğvi məsələsinə Ermənistanın müsbət yanaşmaması vaxtı uzatmaq məqsədi daşıyır. İrəvanın konstitusiya dəyişikliyi məsələsindən yayınması isə Paşinyanın növbəti seçkilərə qədər ehtiyatlı davranması ilə əlaqədardır”.

Qaynarinfo-ya açıqlamasında bunu siyasi şərhçi Qulamhüseyn Əlibəyli İrəvanın Azərbaycanın ATƏT-in Minsk Qrupunun ləğvi və konstitusiya dəyişikliyi tələblərinə hələ də müsbət cavab verməməsi səbəblərindən danışarkən deyib:

"ATƏT-in Minsk Qrupunun ləğv edilməsilə bağlı Ermənistanın hələlik konkret fikir bildirməməsi sadəcə vaxt uzatmaq məqsədi güdən bir hərəkətdir”.

Ekspert qeyd edir ki, Ermənistan qəribə siyasət aparır:

"Sözdə özünü sülhpərvər göstərsə də, faktiki olaraq müxtəlif bəhanələr gətirərək sülh müqaviləsinə imza atmır. Əksinə, hücum silahları ilə silahlanmaqda davam edir. Görünür, İrəvan nəyəsə ümid edir. İrəvanın ABŞ-la strateji tərəfdaşlıq haqqında sənəd imzalaması, birgə hərbi əməliyyat və manevrlər həyata keçirmələri, hətta Amerikanın Avropadakı qoşunlarının müəyyən hissəsinin Ermənistanda yerləşdirilməsi barədə fikirlərin səslənməsi regionda gərginlik yaradır. Bu fonda İrəvan yəqin ki, müəyyən qədər "ümidləndiyindən” sözdə sülhdən danışsa da, reallıqda sülh müqaviləsini imzalamaqdan müxtəlif bəhanələrlə yayınmağa çalışır”.

Konstitusiyanın dəyişdirilməsinə gəldikdə, həmsöhbətimiz deyir ki, Ermənistan cəmiyyəti son rəy sorğusuna görə, Azərbaycanla sülh şəraitində yaşamağa hazır deyil:

"Rəyi soruşulanların əksəriyyəti Azərbaycanla sülh şəraitində yaşamaqdan imtina edib. Əksəriyyət həmçinin konstitusiyanın dəyişdirilməsi əleyhinədir.

Yəni İrəvan bir tərəfdən, xaricdəki havadarlarına arxayın olub, vaxtı uzatmaq istəyir, o biri tərəfdən də daxildəki əhval ruhiyyə sülh şəraitində yaşamağı qəbul etmir. Gələn il Ermənistanda növbəti seçkilər olmalıdır. On görə də Paşinyan komandası ehtiyatlı davranır”.

Qeyd edək ki, Azərbaycan Prezidenti İlham Əliyev Almaniya Prezidenti Frank-Valter Ştaynmayer ilə mətbuata bəyanatında İrəvanla sülh məsələsinə toxunarkən ATƏT-in Minsk Qrupunun ləğvi və Ermənistanın konstitusiyasını dəyişməli olduğunu bir daha diqqətə çatdırıb:

"Bu günə qədər sülh müqaviləsinin mətni tam razılaşdırılıb, 17 paraqrafdan ibarətdir. Azərbaycan burada hər hansı bir əlavə şərt irəli sürmür. Bizim şərtlərimiz Ermənistan üçün bəllidir, yenilik deyil. Bu şərtləri biz uzun müddət ərzində irəli sürürük. Ancaq Ermənistandan bu günə qədər hər hansı bir ciddi cavab almamışıq. Nədən ibarətdir bu? Birinci, ATƏT-in Minsk Qrupu ləğv edilməlidir!

İkinci məsələ Ermənistanın konstitusiyası ilə bağlıdır. Ermənistan konstitusiyasında Ermənistan müstəqillik aktına istinad var. O, konstitusiyanın tərkib hissəsidir. Orada isə Azərbaycanın hüquqi, tarixi ərazisi Ermənistanla birləşməsi haqqında müddəa var və bu, bizə qarşı açıq ərazi iddiası sayılır. Ona görə Ermənistan konstitusiyasından bu bəndin çıxarılması bizim legitim tələbimizdir. Bu iki şərt təmin olunandan sonra sülh müqaviləsini imzalanmaq üçün heç bir maneə olmayacaq. Necə deyərlər, top Ermənistanın tərəfindədir. Əgər Ermənistan doğurdan da sülh müqaviləsini imzalamaq istəyirsə, Azərbaycanın bu iki legitim şərtini qəbul etməlidir”.

Rüfət Sultan