Azərbaycanda ilk dəfə aortanın laylanmış anevrizması “hibrid metodla” müalicə edildi


Azərbaycan Səhiyyəsi daha yeni bir uğura imza atıb. OTV xəbər verir ki, ölkəmizdə ilk dəfə aortanın laylanmış (dissekan) anevrizması “hibrid metodla” Mərkəzi Klinik Xəstəxanada müalicə edilib.

ƏməliyyatMərkəzi Klinik Xəstəxananın baş həkimi, tibb elmləri doktoru, ürək-damar cərrahı Kamran Musayev və onun komandası tərəfindən həyata keçirilib.

Aorta disseksiyası xəstəliyi barədə OTV-ə məlumat verən Dr. Kamran Musayev bildirdi ki, insan orqanizminin ana damarı olan aortanın daxili qişasının cırılması ilə müşahidə olunan bu xəstəlik zamanı ölüm riski yüksəkdir:

“Ölüm riski yüksək olsa da, son illər kardiologiya və ürək-damar cərrahiyəsində bu xəstəliyin müalicəsi sahəsində ciddi nailiyyətlər əldə edilib. Bu sahədə ən son nailiyyət aorta disseksiyasının (və dissekan anevrizmanın) hibrid metodla ləğvidir.

“Hibrid metod” - klassik cərrahi əməliyyatlarla endovaskulyar əməliyyatların birgə istifadə olunmasıdır. Bu yanaşmada daha kiçik miqyaslı açıq əməliyyatlarla endovaskulyar qapalı əməliyyatlar kombinasiya edilir. Beləlilklə, böyük miqyaslı açıq əməliyyatlardan və onların ağırlaşmalarından yayınmaq olur. Eyni zamanda bu metodlarla xəstələrdə qan itkisinin və əlavə travmanın qarşısı alınır”.

Hibrid müalicənin dünaynın qabaqcıl ölkələrində son 10 ildə tətbiq edildiyini deyən Dr.Kamran Musayev bildirdi ki, bu əməliyyat ölkəmizdə ilk dəfə tətbiq edilir:

“Ciddi riskli aorta disseksiyası və aorta anevrizması xəstələri üçün ümid yeri, həyat xilasedici bir alternativ təşkil edən “hibrid müalicə” dünyanın ən qabaqcıl ölkələrində son 10 ildə tətbiq edilməyə başlayıb. Bizim bu müalicə metodunu ilk dəfə tətbiq edərək əməliyya etdiyimiz xəstə 39 yaşında kişi idi. Xəstədə enən aortanın disseksiyası və anevrizması olduğu üçün klassik açıq cərrahiyənin tətbiqi yüksək risk daşıyırdı. Buna görə də, xəstəmizi “hibrid metodla” yuxu arteriyası- körpüçükaltı arteriya şunt + TEVAR ) ilə müalicə etməyə qərar verdik. Əvvəlcə yuxu arteriyası ilə körpücükaltı arteriya arasında şunt əməliyyatı icra etdik. Sonra isə aortanın laylanmış və anevrizmalaşmış seqmentinə qapalı yolla stent-qreft yerləşdirdik (TEVAR).”

Baş həkim bildirdi ki, bu cür əməliyyatları həyata keçirmək üçün ciddi infrastruktur və kadr hazırlığı tələb olunur:

“Bir neçə ildir ki, biz Mərkəzi Klinkada aortanın anevrizmalarında endovaskulyar əməliyyatları icra edirik. Hərtərədfli hazrılıqları başa vurduqdan sonra bu əməliyyatları reallaşdırmağa başladıq. “Hibrid metod” isə daha mürəkkəb, daha çox təcrübə və hazırlıq istəyən bir əməliyyat növüdür. Əməliyyat üçün lazımi hazırlıq işləri bütün incəliklərinə qədər nəzərdən keçirildikdən sonra xəstə əməliyyata alındı. Ciddi risk daşımasına baxmayaraq, komandamızla birgə daha bir uğurlu əməliyyat keçirdik. Artıq xəstəmizi sağalma ilə evə yazmışıq. Bu cür müasir və mürəkkəb metodlu əməliyyaların ölkəmizdə də icra olunmağa başlamasından ötrü çox sevincliyik”




Müəllif: İlhamə Kələyeva | Baxılıb: 34 | Kateqoriya: Tibb Tarix: 1-12-2017, 14:16

DİGƏR XƏBƏRLƏR

CANLI YAYIM