"Google"a qarşı açılan məhkəmə prosesinin mümkün nəticələri arasında "Chrome" brauzerinin satışa çıxarılması da yer alır ki, bu da rəqəmsal ekosistemin strukturunda strateji dəyişikliklərə səbəb ola bilər.

Qaynarinfo xəbər verir ki, ABŞ Ədliyyə Nazirliyinin "Google"a qarşı açdığı iddiada arzu olunan nəticəyə nail olunarsa, internet nəhəngi "Google" öz əsas aktivlərindən biri olan "Chrome" brauzerini satışa çıxarmağa məcbur olacaq. Bu ehtimal artıq potensial alıcıların diqqətini çəkib.

Lakin belə köklü bir dəyişiklik üçün uzunmüddətli bir proses tələb oluna bilər; çünki hələlik məhkəmə prosesi yekunlaşmayıb və son qərarın verilməsi üçün gözləmə müddəti uzana bilər. Üstəlik, "Google"un mümkün satış qərarına etiraz edəcəyini bildirməsi, prosesi daha da ləngidə və brauzerin satışını tamamilə əngəlləyə bilər.

Əgər "Chrome" brauzeri satışa çıxarılsa, ilk sual alıcıların bu brauzerə marağının səbəbi olacaq. Əsasən, brauzerin içərisində "Google Axtarış" sisteminin standart olaraq inteqrasiya olunması, "Chrome"un ən böyük üstünlüklərindən biri sayılır. "Chrome" dünya üzrə brauzer bazarının təxminən 2/3-sinə sahibdir və istifadəçi seçimlərində mühüm yer tutur. Bu vəziyyət brauzeri əldə edən şirkətlərə axtarış mühərriki üzərindən geniş tanıtım və istifadəçi axını imkanı təqdim edir və insanların alternativ axtarış sistemləri əvəzinə "Google"u seçməsinə zəmin yaradır.

Digər tərəfdən, brauzerə sahib olmaq təkcə axtarış mühərrikini dəstəkləməklə kifayətlənmir; "Chrome" kimi böyük istifadəçi bazasına malik bir platforma şirkətlərə məhsul və xidmətlərini qlobal səviyyədə tanıtmaq imkanı verir. "Chrome"u idarə edən bir şirkət məhsullarını dərhal dörd milyard insana təqdim edə bilər ki, bu da rəqəmsal bazarda mövqeyini gücləndirmək və süni intellekt texnologiyaları sahəsində üstünlük qazanmaq istəyən şirkətlər üçün cazibədar bir üstünlükdür.

"Chrome"u satın almağı ciddi şəkildə dəyərləndirənlər arasında diqqətçəkən adlardan biri "OpenAI"dır. "ChatGPT" məhsul meneceri Nik Turli "OpenAI"ın bu brauzeri almağa maraq göstərdiyini bildirib. Çünki "OpenAI" artıq "ChatGPT"yə veb axtarış funksiyası inteqrasiya edib; buna görə də geniş istifadə olunan bir brauzerə sahib olmaq, istifadəçi bazasını əhəmiyyətli dərəcədə genişləndirmək üçün strateji bir addım kimi dəyərləndirilir.

Eyni şəkildə, süni intellekt dəstəkli axtarış xidmətləri təqdim edən "Perplexity" də daha çox istifadəçi cəlb etmək məqsədilə "Chrome"u cəlbedici hesab edir. "Perplexity"nin baş icraçı direktoru bu addımın daha yaxşı süni intellekt agentləri yaratmağa kömək edəcəyini və istifadəçi məlumatlarını analiz edərək fərdiləşdirilmiş reklam imkanları təqdim edəcəyinə inanır.

Digər tərəfdən, "Yahoo" fərqli bir strategiya izləyir. Məhkəmədə öz brauzer prototipini inkişaf etdirdiyini açıqlayan "Yahoo", "Chrome"u satın alaraq daha geniş kütlələrə çatmağı hədəfləyir. "Yahoo Search"ün baş direktoru Brayan Provost bu satınalmanın on milyardlarla dollar dəyərində ola biləcəyini bildirərkən, "DuckDuckGo"nun baş direktoru Qabriel Vaynberq "Chrome"un bazar dəyərinin təxminən 50 milyard dollara qədər çata biləcəyini qeyd edib. Bu qiymətləndirmələr, potensial alıcıların böyük maliyyə sərmayəsi etməli olacağını göstərir.

Bütün bu böyük sərmayələr uzunmüddətli perspektivdə ciddi gəlirlər vəd edir. "Chrome"u əldə edəcək bir şirkət dərhal milyardlarla istifadəçiyə sahib olacaq və bazarda bənzərsiz mövqeyə çıxacaq. Digər tərəfdən, "Google"un ən dəyərli aktivlərindən birinin rəqiblərin əlinə keçməsi, uzunmüddətli perspektivdə "Google" üçün strateji zərbə ola bilər.

Nəticə etibarilə, ABŞ Ədliyyə Nazirliyinin iddiası nəticəsində "Chrome"un satışa çıxarılması ehtimalı rəqəmsal platformalar və texnologiya dünyasında böyük bir dönüşümün başlanğıcı ola bilər. "Google"un etiraz prosesləri bu müddəti uzada bilsə də, brauzeri əldə edəcək potensial alıcı mövcud istifadəçi axını ilə birləşən nəhəng marketinq gücü sayəsində sektorun dinamikalarını yenidən formalaşdıra bilər. Bu inkişaf, xüsusilə axtarış mühərriki və rəqəmsal reklam bazarında rəqabətin və strateji addımların yenidən müəyyənləşdirilməsində açar rol oynayacaq.

Aydın